Patuloy na pinaiigting ng Police Regional Office 6 (PRO6) ang kampanya nito laban sa mga wanted persons, na nagresulta sa pagkakaaresto sa Top 9 Provincial-Level Most Wanted Person ng Aklan sa isinagawang intelligence-driven manhunt operation sa Barangay Poblacion, Nabas, Aklan, bandang 10:38 ng umaga noong Agosto 6, 2026.
Ang akusado na kinilala sa alyas na “Francis,” 40 taong gulang, may asawa, karpintero, at residente ng Barangay Buenavista, Nabas, Aklan, ay naaresto ng mga operatiba ng Nabas Municipal Police Station (MPS) sa tulong ng Provincial Intelligence Team (PIT) ng Aklan Police Provincial Office.
Isinilbi laban sa suspek ang Warrant of Arrest para sa kasong incestuous rape sa ilalim ng Article 266-A, kaugnay ng Article 266-B ng Revised Penal Code, as amended by Republic Act No. 8353, o ang Anti-Rape Law of 1997, at Republic Act No. 11648. Ang warrant ay inilabas ng Regional Trial Court, Branch 3, Sixth Judicial Region, Kalibo, Aklan, noong Agosto 3, 2026.
Pinuri ni PRO6 Regional Director, Police Brigadier General Randulf T Tuaño, ang mga operatiba sa matagumpay na operasyon at muling iginiit ang matatag na kampanya ng PRO6 laban sa mga wanted person, lalo na sa mga nahaharap sa mabibigat na kasong may kinalaman sa pang-aabusong sekswal.
“Walang ligtas na kanlungan ang sinumang nagtatangkang umiwas sa batas. Sa pamamagitan ng mas pinaigting na intelligence-driven manhunt operations at mahusay na koordinasyon ng ating mga yunit, patuloy nating tutugisin ang mga wanted person hanggang sila ay maiharap sa hukuman at mapanagot sa kanilang mga ginawa. Kasabay nito, hinihikayat natin ang iba pang may nakabinbing warrant of arrest na boluntaryong sumuko at harapin ang kanilang pananagutan sa batas,” ani PBGen Tuaño.
Kasalukuyang nasa kustodiya ng Nabas MPS ang akusado habang isinasagawa ang kaukulang dokumentasyon bago ito iharap sa hukuman na nagpalabas ng warrant.
Patuloy na isinusulong ng PRO6 ang mas pinaigting na intelligence-driven manhunt operations at koordinasyon sa iba pang law enforcement agencies upang matunton at maaresto ang iba pang mga wanted persons sa rehiyon.
Hinihikayat din nito ang publiko na makiisa sa pamamagitan ng pagbibigay ng mapagkakatiwalaang impormasyon upang higit pang maisulong ang Responsive, Trusted at Transformative Policing alinsunod sa adbokasiya ng Pambansang Pulisya na “Bagong PNP para sa Bagong Pilipinas: Serbisyong Mabilis, Tapat, at Nararamdaman,” sa ilalim ng pamumuno ni Police General Jose Melencio C Nartatez Jr., Chief, PNP.
