Matagumpay na naaresto ng Police Regional Office MIMAROPA (PRO MIMAROPA) ang No. 8 Most Wanted Person ng Angeles City sa isinagawang joint manhunt operation sa Barangay Zone 4, Socorro, Oriental Mindoro noong Agosto 1, 2026.
Ang operasyon ay isinagawa ng pinagsanib na puwersa ng Socorro Municipal Police Station, Provincial Intelligence Unit ng Oriental Mindoro Police Provincial Office, Police Station 5 ng Angeles City Police Office, Mabalacat City Police Station, Regional Intelligence Unit 4B, 404th Regional Mobile Force Battalion, at iba pang katuwang na yunit.
Inaresto ang suspek sa bisa ng warrant of arrest para sa kasong Sexual Assault sa ilalim ng Article 266-A (2) ng Revised Penal Code kaugnay ng Section 5(B) ng Republic Act No. 7610, na may inirekomendang piyansang Php400,000. Matapos ang pag-aresto, agad siyang dinala sa kustodiya ng Socorro Municipal Police Station habang hinihintay ang paglilipat sa hukuman na nagpalabas ng warrant para sa kaukulang proseso.
Pinuri ni PRO MIMAROPA Regional Director PBGen Christopher R. Dela Cruz ang mga operatiba sa kanilang matagumpay na pagpapatupad ng warrant of arrest. Binigyang-diin niya na ang pagkakadakip ay bunga ng mahusay na koordinasyon, maagap na pagbabahagi ng impormasyon, at sama-samang pagkilos ng iba’t ibang yunit ng kapulisan upang matiyak na ang mga wanted person ay maihaharap sa hukuman saanman sila magtangkang magtago.
Ang matagumpay na operasyon ay umaayon sa F.I.G.H.T. C.R.I.M.E.S. Framework ng PRO MIMAROPA, partikular sa Hit Targets Strategy, na nakatuon sa pagpapaigting ng intelligence-driven manhunt operations, pagpapalakas ng koordinasyon sa pagitan ng mga police unit, at epektibong pagpapatupad ng mga warrant of arrest bilang suporta sa kaligtasan ng publiko at maayos na administrasyon ng hustisya.
Patuloy na pinagtitibay ng PRO MIMAROPA ang kampanya nito laban sa mga wanted person sa pamamagitan ng mas pinaigting na koordinasyon at pagpapatupad ng batas upang mapanatili ang kapayapaan at kaayusan sa bawat komunidad sa rehiyon, alinsunod sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO MIMAROPA
