Naaresto ng mga operatiba ng Payatas Bagong Silangan Police Station (PS13) ang isang 28-anyos na dating marketing manager na kabilang sa Top 6 Station Most Wanted Person sa Quezon City dahil sa 14 na magkakahiwalay na kasong theft noong Agosto 13, 2026. Isinagawa ang operasyon bandang alas-1:25 ng hapon sa Road 4, Barangay Bagong Silangan, sa pakikipag-ugnayan sa mga barangay public safety officers.
Isinagawa ang pag-aresto sa bisa ng 14 na warrant of arrest na inilabas ng isang korte sa Quezon City noong Agosto 12, isang araw bago ang matagumpay na operasyon. Ayon sa mga imbestigador, nag-ugat ang mga kaso sa mga reklamo ng dating kumpanya ng suspek, isang supplier ng salon products, kaugnay ng umano’y hindi na-remit ang collections at iba pang pondo habang siya ay nagsisilbing marketing manager.
Sa kabila ng 14 na kasong kinakaharap, itinakda ng korte ang kabuuang inirekomendang piyansa sa halagang Php120,000. Kasalukuyang nakapiit ang suspek sa PS13 Payatas Bagong Silangan Custodial Facility habang isinasagawa ang kaukulang proseso para sa opisyal na pagsasauli ng 14 na warrant sa korte na nagpalabas ng mga ito.
Pinuri ni PMGen Anthony A. Aberin, Regional Director ng National Capital Region Police Office (NCRPO), ang maingat at matagumpay na operasyon ng mga tauhan ng PS13. Binigyang-diin niya na ang pagkakaaresto sa isang wanted person na nahaharap sa maraming kaso ay patunay ng patuloy na dedikasyon ng mga operatiba sa pagtunton sa mga pugante at paghahatid sa kanila sa harap ng hukuman.
Patuloy namang ipinakikita ng NCRPO at mga police unit nito ang kanilang matatag na paninindigan sa pagpapanatili ng kapayapaan at pagpapatupad ng batas, kaakibat ang pagsusulong ng adhikain ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: NCRPO (https://www.facebook.com/share/p/14qFWV8yVJR/)
