Arestado ng mga operatiba ng Police Regional Office 6 (PRO6) ang Rank 1 Most Wanted Person sa provincial level ng Iloilo sa kasong statutory rape sa isang manhunt operation dakong 9:30 ng umaga noong Oktubre 17, 2026, sa Brgy. Carmelo, Banate, Iloilo. Kinilala ang akusado sa alyas na “Marmar,” 33 taong gulang at residente ng nasabing bayan.
Isinagawa ng tracker team ng Banate Municipal Police Station (MPS) ang operasyon sa bisa ng warrant of arrest na inilabas noong Oktubre 16, 2026, ng Regional Trial Court, Sixth Judicial Region, Branch 66, Barotac Viejo-San Rafael-Banate-Anilao, Iloilo. Walang itinakdang piyansa para sa pansamantalang paglaya ng akusado, na kasalukuyang nasa kustodiya ng Banate MPS para sa kaukulang dokumentasyon at disposisyon.
Ayon kay PBGen Randulf T. Tuaño, Regional Director ng PRO6, “Walang puwang sa ating mga komunidad ang pang-aabuso, lalo na laban sa mga bata. Patuloy nating tutugisin ang mga indibidwal na pinaghahanap ng batas upang matiyak na mahaharap sila sa proseso ng katarungan. Ang bawat matagumpay na pag-aresto ay patunay ng ating determinasyong protektahan ang mga mamamayan, pangalagaan ang mga biktima, at itaguyod ang pananagutan sa ilalim ng batas.”
Tiniyak ng PRO6 na magpapatuloy ang pinaigting na manhunt operations sa buong Western Visayas upang matunton ang iba pang wanted persons at mapanatili ang kapayapaan at kaayusan sa mga komunidad.
Source: PRO6 (https://www.facebook.com/share/p/1ESPA6N7RB/)
