Nagkaloob ang PNP Savings and Loan Association, Inc. (PSSLAI), katuwang ang PNP OLC Foundation, Inc. (OLCFI), ng mga kagamitang medikal at iba pang mahahalagang kagamitan upang mapalakas ang kakayahan ng PNP Health Service na magbigay ng maagap at de-kalidad na serbisyong pangkalusugan para sa mga tauhan ng Philippine National Police (PNP).
Pormal na isinagawa ang turnover ng mga donasyon sa pamamagitan ng paglagda sa Deed of Donation with Acceptance noong Oktubre 22, 2026, sa PNP Health Service Multi-Purpose Hall, Camp BGen Rafael T Crame, Quezon City. Dumalo bilang Guest of Honor and Speaker si Mrs. Mary Rose O. Nartatez, National Adviser ng PNP OLCFI, kasama si Atty. Lucas M. Managuelod, Chairman at CEO ng PSSLAI.
Bahagi ang inisyatibang ito ng pagsusulong sa PNP Focused Agenda, partikular ng Morale and Welfare, na nagbibigay-halaga sa kalusugan at kapakanan ng mga pulis. Sa tulong ng mga karagdagang kagamitan, inaasahang higit na mapahuhusay ng PNP Health Service ang pagsusuri, pagsubaybay, at pagtugon sa mga pangangailangang medikal ng mga tauhan upang masuportahan ang kanilang kalusugan at kahandaan sa pagtupad ng tungkulin.
Ipinakikita ng donasyon ang kahalagahan ng matatag na pakikipagtulungan ng PNP at mga katuwang na organisasyon sa pangangalaga sa kapakanan ng mga naglilingkod sa bayan. Patuloy na isinusulong ng PNP ang pagbibigay ng kinakailangang suporta sa mga tauhan nito, kaakibat ng adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman,” tungo sa mas malusog, handa, at mahusay na kapulisan.
Source: Office of the Chief PNP (https://www.facebook.com/share/p/1Ektv4F1sN/)
