Nagbigay ng kulay at ngiti sa mga residente ng Home for the Aged sa Brgy. San Juan Roro, Sorsogon City at Police Regional Office 5 sa pamamagitan ng PSFTP Class 2026-01 “Balagsik” Team Sorsogon, katuwang ang mga personnel ng Sorsogon City Police Station, sa isinagawang Outreach Program at Feeding Activity noong Hulyo 9, 2026, bilang bahagi ng paggunita sa ika-31 Police Community Relations (PCR) Month.
Sa pamamagitan ng pagbabahagi ng pagkain, pamamahagi ng pangunahing pangangailangan, at paglalaan ng oras para sa mga residente ng nasabing institusyon, naipadama ng mga pulis at kalahok ang kanilang malasakit at pagkalinga sa mga nakatatanda. Higit sa mga naipamahaging tulong, naging mahalaga ang presensya ng mga ito upang makapaghatid ng kasiyahan, makinig sa mga kuwento ng mga residente, at makapagbigay ng sandali ng pakikipagkapwa at pag-asa.
Layunin ng aktibidad na palakasin ang ugnayan ng kapulisan at komunidad sa pamamagitan ng mga programang nakatuon sa serbisyo at malasakit. Isinagawa ito bilang bahagi ng patuloy na pagsusulong ng PRO5, sa ilalim ng pamumuno ni PBGen Erosito M. Miranda, Regional Director, sa pagpapatupad ng PNP Focused Agenda, partikular na sa community support.
Ipinakita ng nasabing aktibidad na ang tungkulin ng kapulisan ay hindi lamang nakatuon sa pagpapanatili ng kapayapaan at kaayusan, kundi maging sa pagbuo ng mas matibay na ugnayan sa mamamayan sa pamamagitan ng mga gawaing nagtataguyod ng malasakit, pagkakaisa, at inklusibong paglilingkod alinsunod sa bisyon ng “Bagong PNP para sa Bagong Pilipinas: Serbisyong mabilis, tapat, at nararamdaman.”
Naging makahulugan ang programa matapos magpahayag ng pasasalamat ang mga residente ng Home for the Aged sa ipinakitang pag-aaruga at pakikipag-ugnayan ng mga pulis at iba pang kalahok. Sa simpleng pagbabahagi ng oras, pagkain, at atensyon, muling naipakita ng ating kapulisan ang kahalagahan ng paggalang at pag-aalaga sa mga nakatatanda bilang mahalagang bahagi ng ating lipunan.
