Pormal na naglabas ng formal statement ang Police Regional Office (PRO) 1 ngayong araw, Nobyembre 15, 2025, sa kanilang pagtatalaga ng kabuuang 1,000 Civil Disturbance Management (CDM) personnel para matiyak ang kapayapaan, kaayusan, at kaligtasan ng publiko sa dalawang naka-iskedyul na mga pangunahing pagtitipon ngayong buwan ng Nobyembre.
Sisiguruhin ng PRO1 ang estratehikong pagpapakalat sa mga CDM personnel sa mga lugar na dadagsain ng mga raliyista sa gaganaping “Rally for Transparency and a Better Democracy” mula Nobyembre 16 hanggang 18, 2025, na inorganisa ng Iglesia ni Cristo, at ang “Trillion Peso March” sa Nobyembre 30.
Ayon kay PBGen Dindo R Reyes, Regional Director ng PRO 1, kumpiyansa siya sa kahandaan ng regional police force na tiyakin ang kaligtasan ng lahat ng mga dadalo sa mga kaganapang ito. Aniya, “I would like to express my deep appreciation for the dedication demonstrated by our PRO 1 team. Their steadfast commitment to promote peace and ensure the safety and security of our communities, especially during important public events, is really admirable.”
Alinsunod sa direktiba ni PLtGen Melencio C Nartatez, Jr., Acting PNP Chief, makatitiyak ang publiko na pangangalagaan at rerespetuhin ng kapulisan ang karapatan ng publiko sa pagpapahayag ng kanilang mga saloobin, subalit hinihikayat din lahat ng kalahok na makipagtulungan sa mga awtoridad sa pagpapanatili ng disiplina at kaayusan sa mga araw ng pagtitipon.
“We respect the constitutional right of citizens to peaceful assembly and freedom of expression. We call on organizers and participants to conduct their activities peacefully and lawfully. Let the call for transparency and accountability resonate in a manner that is orderly, respectful of the law, and mindful of the rights of all citizens,” ani PBGen Reyes.
Samantala, lahat ng deployable CDM contingents ay mahigpit na pinaalalahanan na sundin ang maximum tolerance, sumunod sa police operational procedures, at itaguyod ang karapatang pantao ng lahat ng kalahok.
Source: PRO 1 Public Information Office
