Pinangunahan ni PCol Arbel C. Mercullo, Officer-In-Charge ng Pangasinan Police Provincial Office (Pangasinan PPO), ang pormal na send-off ceremony nitong ika-15 ng Nobyembre, 2025, para sa 300-personnel Civil Disturbance Management (CDM) contingent na itatalaga para sa public safety at security operations sa gaganaping Iglesia Ni Cristo (INC) Peaceful Rally sa Quirino Grandstand, Ermita, Manila mula Nobyembre 16–18, 2025.
Sa aktibidad, binigyang-diin ng Pangasinan PPO ang matibay nitong suporta sa mga pambansang operasyon sa seguridad. Pinuri ni PCol Mercullo ang piling CDM personnel at binigyang-halaga ang kahalagahan ng disiplina, propesyonalismo, at kahusayan, lalo na’t dala nila ang pangalan ng Pangasinan PPO at buong Philippine National Police.
Ayon kay PCol Mercullo, mahalaga ang kanilang presensya upang mapanatili ang kapayapaan at kaayusan habang binabantayan ang karapatan, kaligtasan, at kapakanan ng libo-libong lalahok sa malakihang pagtitipong panrelihiyon.
Bago ang deployment, sumailalim ang 300-CDM contingent sa masusing command briefing upang matiyak ang kanilang kahandaan, malinaw na pag-unawa sa misyon, at koordinasyon kasama ang higher headquarters at iba pang kaagapay na yunit.
Ipinahayag din ni PCol Mercullo ang kanyang buong tiwala sa kakayahan ng contingent, na aniya’y may sapat na karanasan sa crowd management, mabilis na pagtugon sa anumang sitwasyon, at mahigpit na pagsunod sa pamantayan ng PNP. Hinimok niya ang mga tauhan na isagawa ang kanilang tungkulin nang may integridad, pagiging mapagmatiyag, at mataas na antas ng propesyonalismo sa buong tatlong araw na deployment.
Sa pamamagitan ng matatag na liderato at mahusay na paghahanda, nananatiling tapat ang Pangasinan PPO sa layuning suportahan ang ligtas, mapayapa, at maayos na pagsasagawa ng malalaking aktibidad sa lalawigan at maging sa pambansang antas, bilang ambag sa pagtataguyod ng isang Bagong Pilipinas.
Source: Pangasinan Police Provincial Office
Panulat ni PMSG Robert Basan Abella Jr
