Mas pinaigting ng Puerto Princesa City Police Office (PPCPO) ang ugnayan sa komunidad sa pamamagitan ng matagumpay na pagsasagawa ng Revitalized Pulis sa Barangay (R-PSB) Kabataan Serbisyo Caravan na may temang “Hatid Serbisyo para sa ating Kabataan, Gabay sa Kinabukasan” noong Abril 20, 2026. Pinangunahan ito ni PCol Dennis L. De Leon, Acting City Director, na nagsilbing keynote speaker sa nasabing aktibidad.
Layunin ng programa na ilapit ang mahahalagang serbisyo sa mamamayan, lalo na sa kabataan, sa tulong ng iba’t ibang katuwang na ahensya tulad ng Adventist Hospital, Department of Labor and Employment (DOLE), Public Employment Service Office (PESO), at IDEF. Pinangunahan ng City Mobile Force Company (CMFC) ang koordinasyon upang maisakatuparan ang mga serbisyong may kinalaman sa kalusugan, trabaho, at panlipunang kaunlaran.
Bilang bahagi ng Revitalized Pulis sa Barangay program, binigyang-diin sa caravan ang kahalagahan ng matibay na ugnayan sa pagitan ng kapulisan at komunidad. Lalo nitong hinikayat ang aktibong partisipasyon ng kabataan bilang katuwang sa pagpapanatili ng kapayapaan at kaayusan sa kanilang mga lugar.
Sa kanyang mensahe, iginiit ni PCol De Leon na ang kabataan ang pinakamahalagang yaman ng bansa at mahalagang katuwang sa pagbuo ng mapayapa at maunlad na pamayanan. Hinikayat niya ang mga ito na samantalahin ang mga oportunidad na inihahatid ng pamahalaan, maging matatag sa pag-abot ng kanilang mga pangarap, at gampanan ang kanilang papel bilang responsableng mamamayan.
Dumalo rin sa aktibidad ang mga lokal na opisyal, kabilang sina Deputy Mayor Rolando Amurao at mga Punong Barangay ng Inagawan na sina Benjamin R. Salazar at Ariel Lacao, na nagpahayag ng buong suporta sa mga programang naglalayong paunlarin ang kabataan at komunidad. Kabilang sa mga serbisyong ibinigay ay job fair, libreng medical consultation, feeding program, at information drives.
Ang matagumpay na aktibidad na ito ay patunay ng patuloy na pagsisikap ng kapulisan na ilapit ang serbisyo sa mamamayan at palakasin ang pakikipag-ugnayan sa komunidad. Sa ilalim ng adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman,” nananatiling matatag ang Philippine National Police sa pagtataguyod ng kapayapaan, pagkakaisa, at aktibong partisipasyon ng bawat Pilipino tungo sa isang mas maunlad na kinabukasan.
