Nasabat ang mahigit Php696,000 halaga ng shabu sa apat na tinaguriang High Value Individual sa ikinasang buy-bust operation ng mga operatiba ng Manila Police District nito lamang Huwebes, ika-28 ng Marso 2024.
Kinilala ni Police Major General Josel Melencio Nartatez Jr, Regional Director ng NCRPO, ang mga suspek na sina “Soneo”, 36; “Dhanne”, 39; “Archie”, 44; at “Erwin”, 45, na pawang mga naninirahan sa Sampaloc, Manila.
Ayon kay PMGrn Nartatez Jr, ang naganap na buy-bust operation ay pinangunahan ng mga tauhan ng Regional Drug Enforcement Unit (RDEU), NCRPO kasama ang District Drug Enforcement Unit, Manila Police District at SDEU-Sampaloc Police Station, bandang alas-11:00 ng umaga sa kahabaan ng PNR na matatagpuan sa 1842 G. Tuazon corner Algeciraz Street, Barangay 422, Zone 42, Sampaloc, Manila.
Nakuha mula sa possession at kontrol ng mga suspek ang humigit-kumulang 102.4 gramo ng hinihinalang shabu na nagkakahalaga ng Php696,320 at dalawang bundle ng pekeng Php1,000 na ginamit bilang boodle money.
Nahaharap ang mga suspek sa kasong paglabag sa Section 5 (Selling of Dangerous Drugs) ng Republic Act 9165 o mas kilala bilang “Comprehensive Dangerous Drugs Act of 2002”.
Pinuri naman ni RD NCRPO ang dedikasyon at determinasyon ng mga operatiba sa paghuli sa mga drug personalities kasama ng mga ilegal na droga. “Makatiyak ang publiko na habang nakatuon ang komunidad sa kanilang espirituwal na mga obligasyon, mananatiling nakaalerto ang Team NCRPO upang mapanatili ang kaligtasan at seguridad ng publiko, at patuloy na labanan ang paglaganap ng ilegal na droga sa buong Metro, kahit na sa mga holiday”, saad pa niya.
Source: RPIO NCRPO
Panulat ni PSSg Remelin M Gargantos
