Nagpatupad ng Liquor Ban ang lokal na pamahalaan ng Maynila para sa isang ‘mapayapang paggunita ng Semana Santa ngayong 2024 mula Marso 28- 29, 2024.
Ayon kay Manila Mayor Honey Lacuna, ang Executive Order No. 9 ay kinakailangan upang ipagbawal ang pagbebenta at pagkonsumo ng mga inuming nakalalasing at alkohol sa loob ng 500-meter radius ng lahat ng Simbahang Katoliko sa Maynila, upang isasaalang-alang ang paggunita ng Semana Santa.
Kaugnay nito, inatasan din ni Mayor Lacuna si Manila Police District Director, Police Brigadier General Arnold Thomas Ibay na mahigpit na ipatupad ang nasabing kautusan, at idiniin na ang Semana Santa ay dapat gunitain para magmuni-muni at magdasal.
Nanawagan ang alkalde sa mga Manileño na gamitin ang okasyon upang magnilay-nilay, at manampalataya sa halip na makisali sa mga gulo, inuman na kung minsan ay humahantong sa away.
Samantala, inihayag din ni Mayor Lacuna na isasara ang Manila North at South Cemeteries hanggang Easter Sunday. Sa Easter Sunday, ang nasabing dalawang sementeryo ay magbubukas lamang para sa interment purposes.
Dahil dito, buong pwersang magbabantay ang PNP sa buong ka-Maynilaan upang matiyak ang tahimik at ligtas na Semana Santa.
Source: Daily Tribune
