Kalaboso ang dalawang drug pusher makaraang madakip sa buy-bust operation at makumpiska ang tinatayang Php322,000 ng mga tauhan ng Southern Police District nito lamang Miyerkules, Mayo 1, 2024.
Kinilala ni PBGen Mark D Pespes, District Director ng SPD, ang mga suspek na sina alyas “Mark”, HVI-Pusher at alyas “Junivoy”, SLI-Pusher.
Sa pinagsamang pwersa ng DDEU-SPD (lead unit), DID-SPD, DMFB-SPD, PDEA-SDO), at Pasay CPS Sub-Station 4, nahuli ang mga suspek pasado alas-12: 00 ng madaling araw sa isang sementeryo sa kahabaan ng Arnaiz Avenue, Pasay City.
Nagresulta ang operasyon sa pagkakasamsam ng isang knot-tied transparent plastic bag na naglalaman ng 47.36 gramo ng hinihinalang shabu na may tinatayang street value na Php322,048.
Bukod pa rito, nakumpiska ng mga awtoridad ang tunay at pekeng pera na nagkakahalaga ng Php54,000 na ginamit bilang buy-bust money.
Reklamo para sa mga paglabag sa Republic Act 9165, partikular ang Seksyon 5 at 26 ang isasampa laban sa mga nahuling suspek sa Pasay City Prosecutor’s Office.
Patuloy ang Pambansang Pulisya sa pagsasagawa ng mga operasyon ukol sa ilegal na droga upang makamit ang isang maayos, ligtas at tahimik na komunidad tungo sa isang maunlad na Bagong Pilipinas.
Source: SPD PIO
Panulat ni PSSg Remelin M Gargantos
