Timbog ang isang indibidwal matapos makumpiska mula sa kanya ang ilegal na mga armas at bala sa isinagawang Joint Law Operation ng Labangan Municipal Police Station kasama ang Criminal Investigation and Detection Group Zamboanga del Sur Provincial Field Unit sa National Highway, Barangay Upper Sangan, Labangan, Zamboanga del Sur nito lamang Mayo 01, 2024.
Nagresulta ang operasyon sa isang armadong engkwentro na naging sanhi sa pagkakasugat ng isa sa mga suspek sa kanyang kanang paa habang naaresto naman ang isa pang suspek.
Nakumpiska mula sa naarestong suspek na isang 27 anyos at residente ng Labangan, Zamboanga del Sur ang mga kontrabando kung saan agad naman itong dinala sa opisina ng CIDG ZDS para sa dokumentasyon at tamang disposisyon.
Samantala, ang sugatang suspek naman ay agad dinala sa Zamboanga del Sur Medical Center para sa paunang lunas na ngayon ay nasa maayos ng kalagayan.
Mahaharap ang mga suspek sa kasong paglabag sa Republic Act 10591 o Comprehensive Firearms and Ammunition Regulation Act.
Ang matagumpay na operasyon ay resulta ng mas pinaigting na kampanya kontra loose firearms na naaayon sa programa ni Pangulong Ferdinand Marcos Jr., na puksain ang anumang uri ng kriminalidad sa bansa sa pamamagitan ng agarang aksyon para makamit ang isang maayos, mapayapa, at maunlad na Bagong Pilipinas.
Panulat ni Pat Joyce Franco
