Isang 40 anyos na lalaki na kinilala sa alyas na “Allan” ang naaresto matapos makumpiskahan ng 300 gramo ng hinihinalang shabu na tinatayang nagkakahalaga ng Php2,040,000.00 sa isinagawang anti-illegal drug operation sa Brgy. Bagumbayan, Paracale, Camarines Norte, bandang alas 9:20 ng gabi noong Agosto 21, 2026.
Ang operasyon ay isinagawa ng pinagsanib na puwersa ng Operations Division ng Regional Police Drug Enforcement Unit 5 (ODRDO-RPDEU5), katuwang ang Paracale Municipal Police Station (MPS), Police Intelligence Unit (PIU), at 2nd Provincial Mobile Force Company (2nd PMFC) ng Camarines Norte Police Provincial Office at ang National Bureau of Investigation (NBI) Camarines Norte.
Nasamsam mula sa suspek ang anim na heat-sealed transparent plastic sachets na naglalaman ng hinihinalang shabu na may kabuuang bigat na 300 gramo at tinatayang Dangerous Drugs Board standard drug price na Php2,040,000.00.
Matapos ang operasyon, dinala ang suspek at ang mga nakumpiskang ebidensya sa Paracale MPS para sa wastong dokumentasyon, disposisyon, at paghahanda ng kaukulang kaso. Isinailalim din sa marking, imbentaryo, at photographic documentation ang mga nakumpiskang item sa presensya ng suspek at mga kinakailangang saksi upang matiyak ang integridad at maayos na pangangasiwa sa mga ebidensya.
Inihahanda na ang pagsampa ng kaukulang kaso laban sa suspek dahil sa paglabag sa Republic Act No. 9165 o Comprehensive Dangerous Drugs Act of 2002.
Ang matagumpay na operasyon ay patunay ng patuloy na pagsisikap ng Police Regional Office 5 (PRO5), sa pamumuno ni PBGen Erosito N. Miranda, Regional Director, na paigtingin ang mga operasyon laban sa ilegal na droga at sugpuin ang mga aktibidad ng mga indibidwal na sangkot sa ilegal na kalakalan ng droga sa rehiyon.
Kaakibat nito ang pagpapatupad ng PNP Focused Agenda partikular na ang Enhanced Managing Police Operations, na nagbibigay-diin sa tuloy-tuloy, intelligence-driven, koordinadong mga operasyon laban sa kriminalidad at iba pang banta sa seguridad ng publiko.
Patuloy ding pinagtitibay ng PRO5 ang koordinasyon sa mga katuwang na law-enforcement agency, pagpapalakas ng intelligence gathering at operational capabilities, at pagtugis sa mga sangkot sa pagpapakalat ng ilegal na droga. Samantala, hinihikayat naman ng PRO5 ang publiko na manatiling mapagmatyag at agad na iulat sa mga kinauukulang awtoridad ang anumang impormasyong may kaugnayan sa ilegal na droga upang makatulong sa pagpapanatili ng ligtas at payapang pamayanan sa buong Bicol Region.
Panulat ni PCpl Doxie Charesse C Casasos
Source: https://www.facebook.com/share/p/1BoVKDemBN/
