Boluntaryong sumuko ang isang miyembro ng Komunistang Teroristang Grupo sa tanggapan ng Tinoc Municipal Police Station, Poblacion, Tinoc, Ifugao nito lamang ika-5 ng Mayo 2024.
Kinilala ni Police Colonel Marvin S Diplat, Provincial Director ng Ifugao Police Provincial Office, ang sumuko na isang 36 anyos, may asawa, residente ng nasabing munisipalidad, at dating miyembro ng NPA sa Barrio sa ilalim ng KLG IFUGAO/ Nona Del Rosario Command.
Kasabay sa kanyang pagtalikod sa teroristang grupo ay ang pagsuko rin ng kanyang mga armas na isang kalibre 38 na walang serial number at bala, at isang rifle grenade na may serial number na M-76-A-1 AVA-09808-02.
Kanya ring isiniwalat na siya ay narecruit bilang NPA sa Barrio sa ilalim ng NDRC na pinamumunuan ni aka PEDRO sa Tinoc, Ifugao at nanilbihan bilang kontak person at spotter ng teroristang grupo laban sa pwersa ng gobyerno, at responsable sa pagdadala ng pagkain at logistical na supply ng grupo.
Ayon kay PCol Diplat, ang nasabing pagbabalik-loob ng dating NPA sa Bario ay bunga ng pagsisikap ng iba’t ibang yunit ng Ifugao PNP sa pangunguna ng mga operatiba ng Tinoc MPS at 1501st Maneuver Company ng Regional Mobile Force Battalion 15 katuwang ang PNP Special Action Force, 54th Infantry Division, Philippine Army at ibang mga ahensya ng pamahalaan na nangunguna sa pagpapaigting sa Executive Order 70 – National Task Force to End Local Communist Armed Conflict.
Ang sumuko ay kasalukuyang sumasailalim sa custodial debriefing sa pangangalaga ng pulisya.
Muli namang nananawagan si PCol Diplat sa mga natitirang miyembro ng teroristang grupo na magbalik-loob at suportahan ang programang pangkapayapaan na inihanda ng pamahalaan para sa mas mapayapa at ligtas na bagong Pilipinas.
Panulat ni PSSg Ermilinda Cacliong
