Narekober ng 705th Maneuver Company, Regional Mobile Force Battalion 7 ang Improvised Explosive Device (IED), Caliber 38 na baril at iba pang kagamitan ng rebeldeng grupo sa Sitio Nahayag, Barangay Talalak, Sta Catalina, Negros Oriental, noong ika-26 ng Marso 2024.
Ayon kay Police Colonel Dyan Vicente Agustin, Force Commander ng Regional Mobile Force Battalion 7, bandang 3:00 ng hapon ng marekober ang isang yunit ng .38 Caliber Revolver na walang serial number, apat na bala ng .22 cal, mga kagamitan sa Improvised Explosive Device at iba pang mga gamit ng Communist Terrorist Group.
Samantala, inaalam pa ng mga awtoridad ang pagkakakilanlan ng nasabing grupo at patuloy pa rin ang isinasagawang operasyon ng mga militar at kapulisan para matiyak ang katahimikan sa nasabing bayan.
Ang matagumpay na operasyon ay bunga ng pinagsanib-pwersa ng Intel Headquarters RMFB 7, Technical Support Company RMFB 7, Regional Intelligence Unit 7, at Sta Catalina Municipal Police Station.
Ang RMFB 7 ay patuloy ang pagpapaigting sa kampanya laban sa insurhensiya at kriminalidad na naglalayong mahikayat na sumuko ang mga komunistang teroristang grupo sa pamahalaan at mamuhay ng maayos at tahimik kasama ang kanilang mahal sa buhay.
