Narekober ang mga baril at iba’t ibang klase ng bala sa isinagawang joint Seaborne Patrol Operation ng mga awtoridad sa Pundohan Lagasan, Barangay Datu Baguinda Puti, Sitangkai, Tawi-Tawi noong ika-30 ng Abril 2024.
Ayon kay Police Major Abdullah J Jamiri, Hepe ng Sitangkai Municipal Police Station, nakatanggap umano sila ng impormasyon hinggil sa isang engkwentro at lumalalang tensyon sa pagitan ng Pundohan Lagasan at Pundohan Bakkatan na nag-udyok para magsagawa sila ng joint seaborne operation.
Kasama nila sa operasyon ang mga tauhan ng 3rd Maneuver Platoon – 1st Tawi-Tawi Provincial Mobile Force Company, 1st Special Operations Unit, PNP Maritime Group, Sitangkai MLET – MARPSTA na nagresulta sa pagkakarekober ng tatlong yunit ng M1 Garand Rifle, 84 piraso ng bala, 11 piraso ng Clip at isang magazine pouch.
Ang matagumpay na operasyon na ito ay naglalayong makalap at mahanap lahat ng loose firearms para maiwasan na magamit ito sa krimen at mapanatili ang seguridad at kaligtasan ng mamamayan sa bawat komunidad para sa maayos at mapayapang Bagong Pilipinas.
Panulat ni Pat Ma. Señora Agbuya
