Boluntaryong sumuko ang dalawang dating miyembro ng Communist Terrorist Group (CTG) sa Maitum PNP sa Barangay Batian, Maitum, Sarangani Province nito lamang Mayo 1, 2024.
Kinilala ni Police Major Ramil B Aruelo, Acting Chief of Police ng Maitum Municipal Police Station, ang dalawang sumuko na sina alyas “Dream Boy”, 32, may asawa, magsasaka at residente ng Maitum, Sarangani Province at si alyas “Kamandag”, 30 at residente naman ng Lake Sebu, South Cotabato na kapwa miyembro ng Platoon Madrid, South Guerilla Front Daguma FSMR .
Naging matagumpay ang pagsuko ng dalawang CTG sa pinagsanib pwersa na mga tauhan ng Maitum MPS at 2nd Sarangani Police Mobile Force Company kasama ang 1204th Regional Mobile Force Battalion 12, Bravo Company 38th IB at Philippine Army (Lead Unit).
Ayon pa kay PMaj Aruelo, sa pamamagitan ng isinagawa nilang “Serbisyo Caravan” at “Dumanon Kailian” ay napasuko nila ang dalawang CTG na nagtatago sa nasabing barangay.
Kasama rin sa isinuko nila ang isang M79 grenade launcher na may pitong live 40mm ammunitions, isang KG-9 na may isang magazine, isang hand grenade at isang carbine na may isang magasin.
Kasalukuyang nasa kustodiya ng Bravo Company 38th IB, 6ID Philippine Army ang nasabing dalawang dating miyembro ng CTG habang pinoproseso ang dokumentasyon at pagbibigay ng tulong mula sa Enhanced Comprehensive Local Integration Program (E-CLIP) ng gobyerno.
Ang pagbabalik-loob sa pamahalaan ng mga dating miyembro ng CTG ay patunay lamang na patuloy ang pagpapaigting ng mga iba’t ibang ahensya ng pamahalaan ng kanilang kampanya kontra insurhensiya upang tulungan ang mga mamamayan na nalihis ang mga landas na magbalik-loob na at tanggapin ang alok ng gobyerno para magbagong-buhay at mamuhay ng maayos at payapa kasama ang kanilang pamilya.
Panulat ni Vina C Morales
