Nagresulta sa negatibo ang isinagawang spot drug test para sa 126 na mga tauhan ng CARAGA PNP na ginanap sa Surigao del Norte, nito lamang Abril 30, 2024.
Batay sa tala ng Regional Forensic Unit 13, ang 126 na sumailalim sa nasabing drug test ay kinabibilangan ng apat na Police Commissioned Officers; 113 Police Non-Commissioned Officers at siyam na Non-Uniformed personnel na nakatalaga sa istasyon ng Socorro, General Luna, Dapa at 2nd Surigao del Norte Provincial Mobile Force Company na namamahala sa Advance Operation Base sa Sitio Kapihan, Socorro, Surigao del Norte.
Personal na pinangunahan ni Police Brigadier General Kirby John B Kraft, Regional Director ng Police Regional Office 13 ang on-the-spot drug test kasama ang mga tauhan ng RFU13 sa pangunguna ng Officer-In-Charge nitong si Police Lieutenant Colonel Aileen Bernido na siyang nagsagawa ng pagsusuri.
Ang lahat ng mga sample ng ihi ay nag-negatibo para sa pagkakaroon ng tetrahydrocannabinol at methamphetamine na parehong mapanganib na metabolite ng droga na kilala bilang marijuana at shabu.
“We shall serve as an example for the community, especially now that our anti-illegal drug operations are intensified,” ani PBGen Kraft.
Panulat ni Pat Karen A Mallillin
