Mahigit 5,000 kapulisan at katuwang na puwersa ang ipinakalat ng Police Regional Office 6 (PRO6) upang tiyakin ang ligtas, maayos, at mapayapang paggunita ng ika-128 Araw ng Kalayaan ng Pilipinas sa buong Western Visayas sa Hunyo 12. Kabuuang 5,292 security personnel ang nakatakdang magbigay ng seguridad sa iba’t ibang bahagi ng rehiyon, kabilang ang 4,430 miyembro ng Philippine National Police, 761 force multipliers, at 101 augmentation units.
Ayon kay Acting Regional Director ng PRO6 na si PBGen Randulf T. Tuaño, tututok ang mga security personnel sa police visibility, traffic management, checkpoint operations, border control, emergency response, at iba pang law enforcement activities upang mapanatili ang kaayusan at kaligtasan ng publiko. Aniya, layunin ng PRO6 na maging mapayapa at organisado ang pagdiriwang habang pinananatili ang mataas na antas ng kahandaan ng kapulisan sa buong rehiyon.
Binigyang-diin din ni PBGen Tuaño ang kahalagahan ng pagtutulungan ng pulisya, mga lokal na pamahalaan, iba’t ibang ahensya ng gobyerno, at mga force multipliers sa pagpapanatili ng kapayapaan at kaayusan. Aniya, mas napapalakas ang kakayahan ng pamahalaan na protektahan ang mamamayan laban sa anumang banta kapag nagkakaisa at nagtutulungan ang komunidad at mga kinauukulang ahensya.
Kasabay ng pagdiriwang ng Araw ng Kalayaan, muling pinagtibay ng PRO6 ang pangako nitong maghatid ng mabilis, tapat, at nararamdamang serbisyo sa publiko sa ilalim ng Responsive, Trusted, and Transformative Policing. Tiniyak din ng tanggapan na nananatiling nakaalerto at handang tumugon ang lahat ng yunit nito upang matiyak ang ligtas, maayos, at makabuluhang paggunita ng Araw ng Kalayaan sa buong Western Visayas.
Source: ORD-PRO6
