Habang nagsasagawa ng Tree Planting Activity ang mga tauhan ng Barlig Municipal Police Station at 2nd Platoon, 2nd Mountain Province Provincial Mobile Force Company sa Sitio Cabawa, Barlig, Mountain Province, kasama ang Bureau of Fire Protection (BFP), Municipal Disaster Risk Reduction and Management Office (MDRRMO), at mga kawani ng lokal na pamahalaan, nakatanggap sila ng ulat tungkol sa isang residenteng nahulog sa tinatayang walong metrong lalim ng bangin sa Sitio Farurang, Barangay Lias Kanluran, Barlig. Ang insidente, na naganap noong Hulyo 31, 2026, ay nagdulot ng malubhang pinsala sa likod ng biktima.
Sa kabila ng layo ng lugar ng tree planting activity sa pinangyarihan ng insidente, agad na itinigil ng mga pulis at iba pang responder ang kanilang gawain at mabilis na tumungo sa Sitio Farurang upang magsagawa ng rescue operation.
Sa pag-activate ng Fotad, isang tradisyunal na sistema ng agarang pagtawag sa komunidad ng Lias sa panahon ng kagipitan, nadatnan ng mga pulis at iba pang responder ang mga residenteng naunang dumating sa lugar at nagsasagawa na ng paunang lunas sa biktima. Matapos masuri ang kondisyon nito, agad na isinagawa ang koordinado at sama-samang rescue operation.
Ang Fotad ay isang mahalagang bahagi ng kultura at istrukturang panlipunan ng komunidad ng Lias. Nagsisilbi itong tradisyunal na mekanismo upang mabilis na maiparating ang panawagan para sa tulong at mapakilos ang mga mamamayan sa tuwing may sakuna o iba pang emerhensiya.
Sa tulong ng mga boluntaryong residente, maingat na inilikas ang biktima sa pamamagitan ng halos anim na kilometrong rutang binubuo ng makikipot na daanan at mababatong tawiran sa ilog. Matagumpay itong naihatid sa Barlig District Hospital bago inilipat sa Bontoc General Hospital para sa karagdagang gamutan.
Ipinapakita ng matagumpay na rescue operation ang kahalagahan ng pagkakaisa at mahusay na koordinasyon ng kapulisan, mga ahensya ng pamahalaan, at ng komunidad sa pagtugon sa mga emerhensiya. Patunay ito sa dedikasyon ng kapulisan sa pagtiyak sa kaligtasan ng mamamayan at sa pagbibigay ng maagap na serbisyo, na sumasalamin sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PNP Mountain Province Police Provincial Office
