Leyte – Arestado ang tatlong drug personality at nabuwag ang isang drug den sa ikinasang anti-illegal drugs operation ng mga operatiba sa Brgy. Matlang, Isabel, Leyte, nito lamang Lunes ng madaling araw, ika-2 ng Oktubre 2023.
Kinilala ni Police Major Florando Relente, Acting Chief of Police ng Isabel Municipal Police Station, ang mga suspek na si Hendinbergh, 46, residente ng Brgy. Matlang, Isabel, Leyte; Mize, 28, residente ng Brgy. Libjo, Merida, Leyte; at Jose, 42 at residente ng Brgy. Benabaye, Merida, Leyte.
Bandang 12:26 ng madaling araw ng ikasa ang operasyon ng pinagsanib pwersa ng mga tauhan ng PDEA 8-RSET at Isabel Municipal Police Station.
Nakumpiska sa mga suspek ang 5 pakete ng hinihinalang shabu na may tinatayang timbang na 15 gramo at nagkakahalaga ng Php102,000, isang pirasong one-thousand-peso-bill bilang buy-bust money, cellphone at iba pang drug paraphernalia.
Mahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Sinisiguro naman ng PNP katuwang ang PDEA ang walang tigil sa pagsasawata at pagpapaigting ng kampanya laban sa mga gumagamit at nagbebenta ng ilegal na droga sa kanilang nasasakupan.
