Isang mahalagang hakbang tungo sa pangmatagalang kapayapaan ang naitala matapos boluntaryong sumuko ang isang miyembro ng CTG/NPA noong Abril 21, 2026 sa lalawigan ng Abra.
Pinangunahan ng 2nd Abra Provincial Mobile Force Company (PMFC) sa ilalim ng pamumuno ni PLtCol Igan Pioig Ballangan, katuwang ang 77IB 5ID PA at Manabo Municipal Police Station, ang matagumpay na pagsuko ng naturang indibidwal na kabilang sa Rebolusyonaryong Guerrilla Unit (RGU), Platoon Uno ng NPA Abra.
Kinilala ang sumukong rebelde bilang isang 44-anyos na magsasaka mula sa Villaviciosa, Abra. Sa kanyang pagsuko, isinuko rin niya ang isang M16A1 Bushmaster rifle na kalibre 5.56 mm, bagama’t walang kasamang magasin at bala. Ang hakbang na ito ay nagpapakita ng kanyang pagtalikod sa armadong pakikibaka at pagbabalik-loob sa pamahalaan.
Ipinahayag ng sumukong indibidwal ang kanyang suporta sa mga programang pangkapayapaan ng gobyerno, partikular ang Unification Program ng National Task Force to End Local Communist Armed Conflict (NTF-ELCAC) at ang implementasyon ng RLECC Resolution No. 6 o “Dumanon Makitungtung.” Ang kanyang desisyon ay bunga ng patuloy na pakikipag-ugnayan ng mga awtoridad sa komunidad upang hikayatin ang mga naligaw ng landas na magbagong-buhay.
Sa kasalukuyan, nasa kustodiya ng mga awtoridad ang nasabing indibidwal sa Camp Col. Adolfo Catriz Eufemio sa Manabo, Abra para sa debriefing at karagdagang imbestigasyon. Ang tagumpay na ito ay sumasalamin sa pinaigting na kampanya ng kapulisan at kasundaluhan para sa kapayapaan at kaayusan, alinsunod sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman,” na patuloy na nagbibigay pag-asa sa mas ligtas at maunlad na kinabukasan.
Source: Second Abra Provincial Mobile Force Company Facebook page
