Nagpakita ng kahanga-hangang dedikasyon sa serbisyo ang mga tauhan ng Baguio City Police Office – Police Station 9 matapos silang rumesponde sa isang aksidente sa motorsiklo sa Yagyagan, Tuba, Benguet.
Malayo man sa nasasakupang jurisdiction, agad silang umaksyon upang magbigay ng tulong medikal sa isang indibidwal na nasugatan. Pinatunayan ng insidenteng ito na ang tunay na serbisyo publiko ay walang kinikilalang hangganan ng serbisyo, lalo na kung buhay at kaligtasan ang nakataya.
Pagdating sa lugar ng aksidente, mabilis na sinuri ng mga pulis ang kalagayan ng biktima na nagtamo ng pinsala sa ulo at iba pang bahagi ng katawan. Hindi sila nag-atubiling gampanan ang papel bilang mga first responder at agad na nagbigay ng paunang lunas upang mapatatag ang kondisyon ng nasugatan. Ang kanilang maagap at propesyonal na pagkilos ay naging mahalaga upang maiwasan ang mas malalang komplikasyon habang hinihintay ang karagdagang tulong medikal.
Matapos maibigay ang kinakailangang first aid, maayos na naipasa ang biktima sa Emergency Medical Services (EMS) para sa mas masusing gamutan. Ang koordinasyon at bilis ng kanilang aksyon ay nagpapakita ng mataas na antas ng kahandaan at malasakit ng kapulisan.
Ang insidenteng ito ay sumasalamin sa patuloy na adbokasiya ng Philippine National Police na itaguyod ang mithiing “Bagong PNP para sa Bagong Pilipinas: Serbisyong Mabilis, Tapat, at Nararamdaman.” Sa pamamagitan ng mga ganitong halimbawa ng malasakit at dedikasyon, lalong tumitibay ang tiwala ng publiko sa kakayahan at integridad ng kapulisan sa paglilingkod sa bayan.
Source: BCPO Irisan
