Matagumpay na nasamsam ng mga operatiba ng Police Regional Office 3 (PRO3) ang apat na hindi lisensyadong baril at naaresto ang isang 53-anyos na suspek sa isinagawang search warrant operation sa Barangay Digmala, Bongabon, Nueva Ecija noong Hulyo 2, 2026.
Pinagsanib na puwersa ng PRO3, Criminal Investigation and Detection Group (CIDG) Nueva Ecija, Nueva Ecija Police Provincial Office, at Bongabon Municipal Police Station ang operasyon sa bisa ng Search Warrant No. 2026-30 na inilabas ng Regional Trial Court, Branch 111 sa Tarlac City. Mula sa suspek, nakumpiska ang apat na iba’t ibang uri ng baril, kabilang ang isang caliber .45 pistol, isang caliber .40 pistol, isang caliber .357 pistol, at isang caliber .38 pistol, gayundin ang mga bahagi ng baril at mga bala.
Kasalukuyang nasa kustodiya ng Bongabon Municipal Police Station ang naarestong suspek habang inihahanda ang pagsasampa ng kasong paglabag sa Republic Act No. 10591 o Comprehensive Firearms and Ammunition Regulation Act. Samantala, isinailalim na sa tamang disposisyon ang mga nakumpiskang ebidensya matapos itong i-turn over sa Regional Special Operations Group–Regional Intelligence Division 3 (RSOG-RID3).
Pinuri ni PBGen Jess B. Mendez, Regional Director ng PRO3, ang mga operating unit sa matagumpay na intelligence-driven operation. “Illegal firearms continue to pose a serious threat to public safety. Operations like this reflect our unwavering commitment to preventing these weapons from falling into the hands of criminals and being used to commit crimes. We will remain relentless in enforcing our firearms laws and carrying out intelligence-driven operations to help keep our communities safe and secure,” aniya.
Hinikayat din ni PBGen Mendez ang publiko na makiisa sa PNP sa pamamagitan ng pag-uulat ng ilegal na pagmamay-ari ng baril at iba pang gawaing labag sa batas. Aniya, mahalaga ang matatag na ugnayan ng pulisya at komunidad sa pagpapanatili ng kapayapaan at kaayusan, alinsunod sa mantra ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO 3 (https://www.facebook.com/share/p/1dKsApQLHM/)
