Isang patunay ng malasakit at mabilis na pagtugon ang ipinamalas ng mga pulis ng Baguio City Police Office – Police Station 1 matapos mailigtas ang isang 94-anyos na lola na pinaghihinalaang inatake ng stroke noong gabi ng Hunyo 7, 2026. Habang nagsasagawa ng mobile patrol, nilapitan ng mga pulis ang isang nag-aalalang sibilyan na humihingi ng agarang tulong upang madala sa ospital ang matandang babae na bigla umanong nawalan ng malay.
Agad na rumesponde sina PCpl Bert Ryan B. Bunoy, Pat Ronnie T. Cas-oy, at Pat Kentpol S. Bangsoyao. Batid ang kahalagahan ng bawat segundo sa ganitong sitwasyon, maingat nilang isinakay ang pasyente sa kanilang patrol vehicle at mabilis na inihatid sa Baguio General Hospital and Medical Center upang mabigyan ng agarang lunas.
Dahil sa maagap na aksyon ng mga pulis, agad na naagapan at na-stabilize ng mga doktor ang kalagayan ng lola, na kasalukuyan nang nagpapagaling. Ang insidenteng ito ay sumasalamin sa diwa ng “binnadang” sa Cordillera, ang sama-samang pagtutulungan at malasakit ng komunidad na buong pusong isinasabuhay ng kapulisan hindi lamang sa pagpapatupad ng batas kundi maging sa pagliligtas ng buhay.
Ang kabayanihang ito ay nagpapatunay na ang serbisyo ng Philippine National Police ay higit pa sa pagpapanatili ng kaayusan; ito ay nakaugat sa malasakit at makataong paglilingkod. Kaakibat nito ang patuloy na pagsusulong ng adbokasiyang “Bagong PNP para sa Bagong Pilipinas: Serbisyong Mabilis, Tapat, at Nararamdaman,” na naglalayong tiyakin na sa oras ng pangangailangan, maaasahan ang kapulisan bilang tunay na katuwang ng komunidad.
Source: PNP Baguio CPO Police Station 1
