Arestado ang 10 indibidwal at nasagip ang 22 biktima sa mga operasyong may kaugnayan sa cybercrime na isinagawa ng PNP Anti-Cybercrime Group sa iba’t ibang bahagi ng bansa mula Setyembre 18 hanggang 24, 2026.
Ayon kay Police General Jose Melencio C. Nartatez Jr., Chief ng Philippine National Police (PNP), anim sa mga pag-aresto ay isinagawa sa bisa ng mga warrant of arrest, habang apat naman ang resulta ng mga entrapment operation. Kabilang sa mga isinagawang hakbang ang imbestigasyon, cyber patrolling, intelligence monitoring, at pakikipag-ugnayan sa mga nagrereklamo at iba pang law enforcement agency.
Ayon kay PGen Nartatez, magpapatuloy ang PNP sa pagtugon sa mga kaso ng cybercrime habang tinitiyak na nabibigyan ng sapat na tulong at suporta ang mga biktima.
“Online threats can affect people without warning, and our response has to keep pace. We will continue to act on complaints, pursue leads, and provide assistance to those affected. Ang mahalaga, hindi natin hinahayaan na mapabayaan ang mga biktima,” (Maaaring makaapekto sa mga tao ang mga online threat nang walang babala, kaya kailangang makasabay dito ang ating pagtugon. Patuloy nating aaksyunan ang mga reklamo, susundan ang mga lead, at magbibigay ng tulong sa mga apektado. Ang mahalaga, hindi natin hinahayaan na mapabayaan ang mga biktima) ani PGen Nartatez.
Bahagi ang mga operasyon ng Enhanced Managing Police Operations (EMPO) sa ilalim ng PNP Focused Agenda, partikular sa pagtugon sa mga umuusbong na uri ng krimen at pagpapahusay ng police response sa mga insidenteng gumagamit ng mga digital platform.
Ang mga pagsisikap na ito ay naaayon din sa bisyon na “Bagong PNP para sa Bagong Pilipinas: Serbisyong Mabilis, Tapat at Nararamdaman,” upang maihatid ang serbisyo at tulong ng pulisya sa publiko, maging sa digital environment.
(PNP-PIO)
