Tatlong hinihinalang miyembro ng isang robbery group na sangkot umano sa sunod-sunod na pagnanakaw sa ilang minimart sa Central Luzon ang nasugatan matapos makipagbarilan sa mga operatiba ng Philippine National Police (PNP) sa isinagawang dragnet operation sa Bocaue Toll Plaza ng North Luzon Expressway (NLEX) noong Hunyo 26, 2026. Agad na dinala sa pinakamalapit na ospital ang mga suspek upang mabigyan ng kinakailangang medikal na atensyon.
Batay sa imbestigasyon, matagal nang tinutunton ng mga tauhan ng Police Regional Office 3 (PRO3) ang sasakyang ginagamit ng mga suspek na iniuugnay sa mga insidente ng pagnanakaw sa Minalin, Pampanga at Victoria, Tarlac. Sa pakikipag-ugnayan sa pamunuan ng NLEX, matagumpay na naisagawa ang dragnet operation upang harangin ang kanilang sasakyan sa toll plaza.
Ayon kay Police Colonel Jay Baybayan, Provincial Director ng Bulacan Police Provincial Office, nang tangkain ng mga operatiba na lapitan ang sasakyan ng mga suspek ay bigla silang pinaputukan, na nagbunsod ng armadong engkuwentro. Sa kabila ng panganib, naging mabilis at maayos ang pagtugon ng mga pulis na nagresulta sa pagkakasugat at pagkakaaresto sa mga hinihinalang sangkot sa serye ng krimen.
Muling ipinakita ng PNP ang kahandaan at determinasyon nitong sugpuin ang kriminalidad sa pamamagitan ng maagap at koordinadong operasyon upang mapanatili ang kapayapaan at seguridad ng publiko. Ito ay patunay ng patuloy na pagsasabuhay ng kanilang adhikain na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
