Mabilis na naaresto ng Police Regional Office 3 (PRO3) ang suspek sa isang insidente ng pamamaril na ikinasawi ng isang 80-anyos na lalaki sa Purok 2, Barangay Piel, Baliwag City, Bulacan bandang 7:00 ng umaga noong Agosto 2, 2026. Sa loob lamang ng tatlong oras matapos ang krimen, natunton at nadakip ng mga awtoridad ang suspek sa pamamagitan ng agarang follow-up investigation at hot pursuit operation.
Kaagad na rumesponde ang mga pulis upang tiyakin ang seguridad sa lugar habang nagsagawa ang mga imbestigador ng masusing pagtatanong sa mga saksi, pangangalap ng pisikal na ebidensya, at pagsusuri sa mga kuha ng closed-circuit television (CCTV). Ang mabilis na koordinasyon ng mga operating unit ang naging susi sa pagkilala sa suspek at pagtunton sa kanyang kinaroroonan.
Bandang alas-9:30 ng umaga, nagsagawa ng crime scene processing ang Bulacan Forensic Unit-Scene of the Crime Operatives (SOCO), kung saan narekober ang apat na basyo ng bala na hindi pa matukoy ang kalibre at isang fired bullet. Pagsapit ng alas-10:00 ng umaga, matagumpay na naaresto ang suspek. Narekober din sa operasyon ang isang 9mm Smith & Wesson pistol na may isang magazine na naglalaman ng limang bala, isang puting Yamaha Mio Gear na pinaniniwalaang ginamit bilang getaway vehicle, at mga damit na hinihinalang isinuot ng suspek sa oras ng insidente.
Ayon kay Police Brigadier General Jess B. Mendez, Regional Director ng PRO3, ipinakikita ng agarang pagkakaaresto sa suspek ang kahalagahan ng mabilis, masusi, at nakatuong police investigation upang hindi makaiwas sa pananagutan ang mga lumalabag sa batas. Aniya, “Every minute after a crime is committed is critical. In this case, our investigators immediately pursued every available lead—from witness accounts and CCTV footage to the recovery of physical evidence—which enabled us to identify and arrest the suspect in less than three hours.”
Kasalukuyang isinasailalim sa ballistic at forensic examination ang mga nakuhang ebidensya habang inihahanda ang pagsasampa ng kasong murder laban sa suspek sa Office of the Provincial Prosecutor sa Lungsod ng Malolos. Muling pinagtibay ng PRO3 ang patuloy nitong dedikasyon sa maagap na pagpapatupad ng batas, alinsunod sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO 3
