Mabilis na rumesponde ang mga tauhan ng Regional Mobile Force Battalion MIMAROPA (RMFB 4B) sa isang vehicular accident na kinasasangkutan ng nasusunog na motorsiklo sa kahabaan ng national highway sa Barangay Papandayan, Pinamalayan, Oriental Mindoro noong umaga ng Hunyo 3, 2026.
Bandang 10:38 ng umaga nang magbanggaan ang isang Suzuki Smash na minamaneho ng residente ng Bansud at isang Tamaraw FX na minamaneho naman ng residente ng Gloria. Makalipas ang banggaan, biglang nagliyab ang motorsiklo, na nagdulot ng panganib sa mga dumaraang motorista at kalapit na establisimyento.
Nagkataong pabalik sa kanilang himpilan ang mga tauhan ng RMFB 4B mula sa routine patrol nang mapansin ang insidente. Agad silang huminto upang tumulong, siniguro ang kaligtasan ng mga sangkot, at inayos ang sitwasyon sa lugar. Sa pakikipag-ugnayan sa iba pang rumespondeng ahensya, mabilis nilang naapula ang apoy gamit ang fire extinguisher na hiniram mula sa kalapit na gasolinahan bago pa ito tuluyang kumalat.
Tumulong din ang RMFB 4B, kasama ang mga responder mula sa Pinamalayan Rescue/MDRRMO, sa pamamahala ng daloy ng trapiko at pagbibigay ng agarang tulong sa mga nasangkot sa aksidente.
Pinuri ni PBGen Christopher R. Dela Cruz, Acting Regional Director ng PRO MIMAROPA, ang agarang aksyon ng mga tauhan at ang kanilang malasakit sa kaligtasan ng publiko. “Our personnel responded the way police officers are expected to respond when people need help — quickly, responsibly, and with concern for public safety. Their actions helped control the situation and prevent a potentially more serious incident,” aniya.
Patuloy na isinusulong ng PNP ang serbisyong may malasakit sa ilalim ng “Bagong PNP para sa Bagong Pilipinas: Serbisyong Mabilis, Tapat, at Nararamdaman,” bilang gabay sa bawat kilos at pagtugon ng mga alagad ng batas sa pagtugon sa anumang uri ng emerhensiya at pagpapanatili ng kaayusan sa komunidad.
Source: PRO MIMAROPA
