Ipinamalas ng Regional Mobile Force Battalion 15 (RMFB15) ang patuloy nitong dedikasyon sa paglilingkod sa mamamayan sa pamamagitan ng pakikiisa sa GreenWater Village Agriculture and Fisheries Association (GWAFA) Kick-Off Feeding Program and Litter Picking Activity na ginanap noong Hulyo 15, 2026, sa Barangay Green Water.
Pinangunahan ni PLt Ruby Rose D. Pesase ang delegasyon sa ilalim ng pamamahala ni PLtCol Joey Jonathan B. Bagayao, Acting Force Commander, bilang bahagi ng pagsusulong ng kalusugan, kalinisan, at kapakanan ng komunidad.
Sa isinagawang aktibidad, nagbigay ang RMFB15 ng police assistance, namahagi ng Anti-Bullying Information, Education, and Communication (IEC) leaflets, at nakiisa sa Free Haircut Program para sa mga residente. Isinagawa ang programa sa pakikipagtulungan ng Barangay Council sa pangunguna ni Punong Barangay Rogelio Tayoan bilang bahagi ng pagdiriwang ng Nutrition Month na may temang “Nutrisyon at Kalinisan Ating Pangalagaan.”
Bukod sa feeding program at clean-up activities, isinulong din ng mga kalahok ang kahalagahan ng wastong nutrisyon, pangangalaga sa kalikasan, tamang segregasyon at pagtatapon ng basura, at aktibong pakikilahok ng mamamayan sa pagpapanatili ng isang ligtas, malinis, at maayos na komunidad. Ang mga gawaing ito ay nagpatibay sa ugnayan ng kapulisan at ng mga residente sa paghahatid ng makabuluhang serbisyo publiko.
Patunay ang inisyatibang ito ng hangarin ng Philippine National Police na maging aktibong katuwang ng komunidad hindi lamang sa pagpapanatili ng kapayapaan kundi maging sa pagsusulong ng pangkalahatang kapakanan ng mamamayan, kaakibat ang patuloy na pagsasabuhay ng adbokasiyang “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: RMFB 15
