Nagpahayag ng buong suporta ang Police Regional Office Cordillera Administrative Region (PRO CAR) sa pagdiriwang ng ika-39 Cordillera Day Celebration na ginanap sa La Trinidad, Benguet noong Hulyo 15, 2026. Sa pakikiisa sa makabuluhang okasyon, muling pinagtibay ng PRO CAR ang pangako nitong pangalagaan ang mayamang kultura ng Cordillera at suportahan ang patuloy na pag-unlad ng rehiyon.
Pinangunahan ni PBGen Ericson D. Dilag, Regional Director ng PRO CAR, ang mga tauhan ng kapulisan sa ceremonial parade mula Benguet Provincial Capitol patungo sa Benguet Sports Complex, na sinundan ng programa sa Benguet Sports Complex Gymnasium. Nagbigay naman ng karagdagang sigla sa pagdiriwang ang PRO CAR Band sa pamamagitan ng kanilang pagtatanghal na nagbigay-kulay sa naturang aktibidad.
Dumalo rin sa selebrasyon sina PCol Froiland B. Lopez, Officer-in-Charge, Deputy Regional Director for Operations; PCol Arnold D. Razote, Officer-in-Charge, Chief Regional Staff; PCol Dionisio D. Bonoy, Provincial Director ng Benguet Police Provincial Office; PCol Ruel D. Tagel, City Director ng Baguio City Police Office; PCol Gilbert A. Fati-Ig, Provincial Director ng Kalinga Police Provincial Office, kasama ang iba pang opisyal ng PRO CAR, mga pinuno ng pamahalaang lokal, mambabatas, pribadong sektor, at mga katuwang sa pagpapaunlad ng rehiyon.
Bahagi ang pagdiriwang ng isang buwang selebrasyon na may temang “Smart Cordillera: Enabling Local Enterprises Through Digital Transformation and Regional Autonomy,” na nagbibigay-diin sa pagsusulong ng makabagong kaunlaran at mas matatag na pamamahala sa rehiyon alinsunod sa Executive Order No. 220.
Sa patuloy na pakikiisa ng PNP sa mga gawaing pangkomunidad, isinasabuhay nito ang mantra na “Bagong PNP para sa Bagong Pilipinas: Serbisyong Mabilis, Tapat, at Nararamdaman,” bilang gabay sa tapat at makabuluhang serbisyo para sa mamamayan.
Source: PRO CAR
