Arestado ang isang suspek na nakalista bilang Regional Most Wanted Person sa CALABARZON matapos ipatupad ng mga operatiba ng Rizal Provincial Police Office (PPO) ang warrant of arrest sa kahabaan ng Aurora Boulevard, Cubao, Quezon City, dakong 11:27 ng gabi noong Oktubre 15, 2026.
Kinilala ang naaresto sa alyas na “Dan,” 32 anyos, walang trabaho, at residente ng Brgy. Ususan, Taguig City. Isinagawa ng Rizal Provincial Intelligence Unit, katuwang ang Rodriguez Municipal Police Station (MPS), ang operasyon kaugnay ng kasong Serious Illegal Detention, batay sa warrant na inilabas ng Regional Trial Court, National Capital Judicial Region, Branch 195, Parañaque City, noong Setyembre 21, 2026, na walang inirekomendang piyansa.
Iniuugnay rin ang suspek sa isang kasong pagpatay na naganap sa Rodriguez, Rizal, noong Setyembre 16, 2026, kung saan natagpuan ang biktima sa loob ng isang refrigerator. Habang nasa kustodiya ng pulisya, inihain din sa kanya ang isa pang warrant of arrest kaugnay ng kasong robbery, na inilabas ng kaparehong korte noong Nobyembre 13, 2025.
Matapos ipaalam sa suspek ang kanyang mga karapatang konstitusyonal sa wikang nauunawaan niya, dinala siya sa custodial facility ng Rodriguez MPS para sa kaukulang proseso. Ibabalik naman sa korte ang warrant of arrest para sa mga susunod na hakbang, kabilang ang pag-isyu ng commitment order. Naitala rin ang pagpapatupad ng warrant gamit ang mobile phone bilang Alternative Recording Device (ARD), alinsunod sa umiiral na mga alituntunin.
Sa mensahe ni PCol Atty. Eleazar R Barber Jr., Provincial Director, “Ang matagumpay na operasyon na ito ay patunay ng ating matatag na paninindigan sa pagpapatupad ng batas at pagdadala sa mga wanted person sa tamang proseso ng katarungan.”
Patuloy na isinusulong ng PNP ang maagap, responsable, at makataong pagpapatupad ng batas bilang bahagi ng adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: Rizal PPO (https://www.facebook.com/share/p/1F8sM3XP3c/)
