Nasawi ang isang Police Captain matapos na sitahin ang isang armadong sibilyan na nauwi sa palitan ng putok sa Barangay Poblacion 2 Parang, Maguindanao del Norte pasado alas onse ng umaga, araw ng Huwebes, ika-2 ng Mayo 2024.
Kinilala ang nasawing pulis na si Police Captain Roland Arnold Suarez Moralde, 42 taong gulang na kasalukuyang Chief Admin ng Regional Mobile Force Batallion 14-A PRO BAR at ang suspek ay kinilalang si Mohiden Ramalan Untal “Pogi” na idineklarang dead on arrival.
Lumalabas sa imbestigasyon ng Parang MPS na sinita umano ni Police Captain Moralde ang suspek, matapos nitong makitaan na may nakasukbit na baril sa Barangay Poblacion Public Market at nang lapitan ng biktima ang suspek, ito’y nanlaban at nagresulta sa palitan ng putok. Pagkaraan nito’y, dumating ang mga hindi pa nakilalang mga suspek at pinagbabaril din ang naturang biktima.
Narekober ng SOCO Team mula sa crime scene ang walong .45 cal. fired cartridges, dalawang piraso ng 9mm cal. fired cartridges at apat na piraso ng 5.56mm fired cartridges.
Parehong nagtamo ng mga tama ng bala sa katawan at ulo ang biktima at suspek na nagresulta ng malubhang sugat at naging sanhi ng kanilang pagkasawi, habang patuloy na tinutugis ng mga kapulisan ang iba pang mga suspek na nakatakas.
Ayon kay Police Lieutenant Colonel Christopher A Cabugwang, Hepe ng Parang MPS ay patuloy na isinasagawa ang Hot Pursuit Operation para sa agarang pagkadakip ng mga nakatakas na suspek at mabigyan ng hustisya ang pagkamatay ni PCpt Moralde.
