Muling nagtagumpay ang Police Regional Office 11 (PRO11) sa kampanya laban sa ilegal na droga matapos maaresto ang isang drug personality na kinilala sa alyas na “Pungkol” at makumpiska ang humigit-kumulang 51 gramo ng hinihinalang shabu na nagkakahalaga ng Php346,800 sa isinagawang buy-bust operation sa Compostela, Davao de Oro, noong Nobyembre 17, 2026.
Pinangunahan ni PCpt Damiano A Albacite Jr. ng Regional Police Drug Enforcement Unit 11 (RPDEU11) ang operasyon sa ilalim ng direktang superbisyon ni PLtCol Maynard D Pascual, Chief ng RPDEU11, katuwang ang mga tauhan ng Compostela Municipal Police Station sa pangunguna ni PLtCol Junvic N Nasayao at Davao de Oro Police Provincial Office–Provincial Intelligence Unit (DDOPPO-PIU). Isinagawa ang operasyon sa koordinasyon sa Philippine Drug Enforcement Agency Region XI (PDEA XI).
Bukod sa hinihinalang shabu, nakumpiska rin sa operasyon ang dalawang cellular phone, isang digital weighing scale, isang sling bag, isang tunay na Php1,000 bill na ginamit bilang buy-bust money at siyam na piraso ng boodle money.
Isinagawa ang pagmamarka at imbentaryo sa mga nakumpiskang ebidensya sa lugar ng operasyon sa presensya ng suspek at mga kinakailangang saksi, alinsunod sa itinakda ng Section 21 ng Republic Act No. 9165 o Comprehensive Dangerous Drugs Act of 2002. Kasalukuyang nasa kustodiya ng pulisya ang suspek at haharap sa kaukulang mga kasong paglabag sa batas.
Binigyang-diin ni PRO 11 Acting Regional Director PBGen Benigno L Guzman na bahagi ang operasyon ng patuloy na pagsisikap ng PRO11 na sugpuin ang ilegal na droga at protektahan ang mga komunidad laban sa masasamang epekto nito.
Alinsunod sa adbokasiya ng PNP na “Bagong PNP para sa Bagong Pilipinas: Serbisyong Mabilis, Tapat at Nararamdaman,” patuloy na paiigtingin ng PRO11 ang kampanya laban sa ilegal na droga sa pakikipagtulungan sa mga katuwang na ahensya at komunidad upang mapanatili ang kaligtasan at kapayapaan sa buong Rehiyon XI.

