Nakumpiska ang higit Php3.8 milyong halaga ng ilegal na droga sa naarestong High Value Individual sa ikinasang buy-bust operation ng pulisya ng Batangas sa Barangay Santol, Balayan, Batangas nito lamang ika-27 ng Abril 2024.
Kinilala ni Police Major Domingo D. Ballesteros Jr., Acting Chief of Police ng Balayan Municipal Police Station, ang suspek na si alyas “Darwin”, 27, lalaki, residente ng Barangay Santol, Balayan, Batangas at nakalista bilang High Value Individual sa Batangas Drugs Watchlist.
Ayon kay PMaj Ballesteros Jr, dakong 1:25 ng gabi isinagawa ang buy-bust operation ng Balayan PNP at sa koordinasyon ng Philippine Drug Enforcement Agency 4A.
Nakumpiska sa suspek ang 14 heat sealed plastic sachet at limang buhol na nakatali na plastic sachet na naglalaman ng hinihinalang shabu na may timbang na humigit kumulang 563 gramo na nagkakahalaga ng Php3,828,400 at drug bust money.
Nahaharap ang suspek sa kasong paglabag sa Section 5 at Section 11 ng Article II ng Republic Act 9165 o ang Comprehensive Dangerous Drugs Act of 2002.
Ang kapulisan ng Batangas ay patuloy sa pagsasagawa ng mga operasyon laban sa ilegal na droga at anumang uri ng kriminalidad sa tulong na rin ng iba pang ahensya ng gobyerno upang mapanatili ang payapa at maayos na komunidad tungo sa layunin ng ating pangulong Ferdinand R. Marcos Jr. na Bagong Pilipinas.
Source: PRO4A-PIO
Panulat ni Pat Maria Sarah P Bernales
