Davao City – Tinatayang aabot sa Php113,190 halaga ng hinihinalang shabu ang nasabat sa dalawang drug personality sa Brgy. Mapula Paquibato District, Davao City nito lamang Araw ng mga Patay, Nobyembre 1, 2023.
Kinilala ni Police Major Jack Tilcag, Station Commander ng Paquibato Police Station, ang dalawang suspek na sina alyas “Leonardo” at alyas “Jedrick” na kabilang sa mga Street Level Drug Personality sa lugar.
Naaresto ang dalawang suspek matapos mag-responde ang pinagsamang tauhan ng Paquibato Police Station at Revitalized-Pulis Sa Barangay (R-PSB) Mapula dahil sa isang tawag ng concerned citizen.
Nakuha mula sa mga suspek ang ilang pakete ng hinihinalang shabu na may bigat na humigit kumulang na 16.17 gramo na may street market value na aabot sa Php113,190 at isang caliber .38 na baril na may kasamang isang bala.
Ang dalawang suspek ay mahaharap sa mga kasong paglabag sa Republic Act 9165 o Comprehensive Dangerous Drugs Act of 2002, RA 10591 o Comprehensive Firearms and Ammunition Regulation Act at paglabag sa COMELEC Gun Ban.
Muli naman nagpaalala ang Police Regional Office 11 sa mga gumagawa ng kasamaan at kriminalidad na tumigil sa kanilang mga gawain dahil hindi titigil ang PNP sa panghuhuli sa mga taong may utang sa ating batas.
Panulat ni Patrolman Alfred Vergara
