Patuloy na pinaiigting ng Police Regional Office 6 (PRO6) ang kampanya nito laban sa ilegal na pangingisda sa buong Western Visayas, matapos makapagtala ng mahahalagang resulta mula Hulyo 1 hanggang 10, 2026, bilang bahagi ng patuloy na pagsisikap na mapangalagaan ang yamang-dagat at masuportahan ang kabuhayan ng mga mangingisdang sumusunod sa batas.
Batay sa pinagsamang accomplishment report, nagsagawa ang mga yunit ng PRO6 ng 58 operasyon kontra illegal fishing sa buong rehiyon na nagresulta sa pagkakaaresto sa 98 indibidwal dahil sa paglabag sa mga batas sa pangisdaan.
Sa mga isinagawang operasyon, nakarekober ang mga awtoridad ng mga isda at iba pang gamit sa pangingisda na nagkakahalaga ng Php111,360.00, kabilang ang mga kagamitan at motorboat na may kabuuang tinatayang halaga na Php10,164,490.00.
Isinagawa ang mga operasyon katuwang ang mga kaukulang ahensya ng pamahalaan at mga lokal na stakeholder upang matiyak ang maayos na pagpapatupad ng mga regulasyon sa pangisdaan at mapangalagaan ang mga yamang-dagat at coastal ecosystem ng rehiyon.
Nanguna sa mga yunit ng PRO6 ang Iloilo Police Provincial Office (IPPO) na nakapagsagawa ng 23 operasyon, nakahuli ng 39 indibidwal, at nakarekober ng mga gamit sa pangingisda kabilang ang mga motorboat na nagkakahalaga ng Php7,557,300.00. Kasunod naman ang Antique Police Provincial Office na nagsagawa rin ng 23 operasyon at nakarekober ng mga kagamitan na nagkakahalaga ng Php755,290.00.
Samantala, nakapagsagawa naman ang Guimaras Police Provincial Office ng limang operasyon at nakarekober ng mga gamit na may halagang Php1,286,000.00, habang nakapag-ambag din ang Aklan at Capiz Police Provincial Offices sa pamamagitan ng kanilang mga enforcement activities.
Binigyang-diin ni PRO6 Acting Regional Director Police Brigadier General Randulf T. Tuaño na ang kampanya laban sa illegal fishing ay hindi lamang tungkol sa pagpapatupad ng batas, kundi bahagi rin ito ng mas malawak na layunin na maprotektahan ang kapaligiran at ang kabuhayan ng mga komunidad na umaasa sa karagatan.
Nanawagan din si PBGEN Tuaño sa publiko, lalo na sa mga komunidad na malapit sa baybayin, na manatiling mapagmatyag at agad iulat ang anumang gawain na maaaring makasira sa yamang-dagat.
Ang naturang accomplishment ay nagpapakita ng patuloy na pangako ng PRO6 sa “Responsive, Trusted, and Transformative Policing for a Safer Western Visayas” sa pamamagitan ng mas pinaigting na pagpapatupad ng batas, community-oriented policing, at mga serbisyong nakatuon sa pangangailangan ng mamamayan. Kaakibat ito ng PNP Focus Agenda at ng adhikaing “Bagong PNP para sa Bagong Pilipinas: Serbisyong Mabilis, Tapat at Nararamdaman.”
Patuloy na hinihikayat ng PRO6 ang mga coastal communities, mga samahan ng mangingisda, at iba pang stakeholder na maging aktibong katuwang sa pangangalaga ng yamang-dagat at pagsusulong ng responsableng pangingisda upang mapanatili ang likas at pang-ekonomiyang yaman ng Western Visayas.
