Mainit na sinalubong ng mga tauhan ng National Capital Region Police Office ang isinagawang Command Visit ni Chief PNP PGen Rommel Francisco D Marbil sa NCRPO Hinirang Multi-purpose Hall, Camp Bagong Diwa, Bicutan, Taguig City nito lamang Martes, ika-7 ng Mayo 2024.
Ang mainit na pagtanggap kay PGen Marbil ay pinangunahan ni NCRPO Regional Director PMGen Jose Melencio C Nartatez Jr kasama ang Command Group, Chief of Regional Support Units, District Directors at iba pang tauhan ng NCRPO.
Si Chief PNP ay pinagkalooban ng Foyer Honors ng mga tauhan ng NCRPO. Alinsunod sa kanyang pagbisita, sinimulan ito ng tradisyonal na guest book signing kasama si RD Nartatez at ng iba pang miyembro ng NCRPO Command Group.
Nanawagan naman si PGen Marbil na unahin ang legal at medikal na pangangailangan ng mga tauhan ng PNP at pagandahin ang sistema ng promosyon sa organisasyon.
Binigyang-diin din niya ang kahalagahan ng mahusay na paggamit ng oras ng trabaho at pagbuo ng mas matibay na ugnayan sa pagitan ng PNP at ng komunidad, na naaayon sa kanyang mantra na, “Sa Bagong Pilipinas, ang Gusto ng Pulis, Ligtas Ka!”
Ang makabuluhang pagbisita ay nagsilbing magandang pagkakataon para sa diyalogo at pakikipagtulungan sa pagitan ng Ama ng Pambansang Pulisya, at ng pamunuan ng NCRPO, na nagpapatibay ng higit na koordinasyon at pagtutulungan sa mga pagsisikap sa pagpapatupad ng batas upang matiyak ang mahusay at epektibong pagpapatupad ng mga programa ng PNP, at pagpapalakas ng moral at kapakanan ng mga tauhan ng pulisya sa lahat ng rehiyon.
Source: RPIO NCRPO
Panulat ni PSSg Remelin M Gargantos
