Bilang bahagi ng patuloy na pagpapalakas ng kakayahan ng mga pulis sa pagpapatupad ng batas, nagsagawa ang mga tauhan ng Masbate 1st Provincial Mobile Force Company (PMFC) ng pagsasanay sa Arnis Weapon Disarming Techniques, Review/Familiarization, at Self-Defense noong Hulyo 14, 2026.
Isinagawa ang aktibidad sa ilalim ng direktang pangangasiwa ni PLtCol Michael P. Lorilla, Officer-in-Charge ng Masbate 1st PMFC, bilang bahagi ng programa ng yunit upang higit pang mapaunlad ang kahandaan at kasanayan ng mga tauhan sa pagharap sa iba’t ibang sitwasyon na may kaugnayan sa pagpapatupad ng batas.
Layunin ng pagsasanay na mapahusay ang operational readiness, kakayahang depensahan ang sarili, at tactical proficiency ng mga pulis sa pamamagitan ng paggamit ng mga teknik sa pagdisarma ng armas gamit ang Arnis, mga kasanayan sa self-defense, at muling pagtalakay sa mga pangunahing prinsipyo na mahalaga sa epektibong pagpapatupad ng batas.
Binigyang-diin din sa pagsasanay ang paggamit ng less-lethal approaches o mga paraang hindi nakamamatay kung naaangkop, upang ligtas na makontrol at ma-neutralisa ang mga banta habang pinapaliit ang posibilidad ng pinsala sa kapwa pulis at sa publiko.
Ayon sa pamunuan ng Masbate 1st PMFC, ang naturang pagsasanay ay bahagi ng tuloy-tuloy na capability enhancement program ng yunit upang matiyak na ang bawat tauhan ay nananatiling handa sa pisikal at mental na aspeto, may mataas na antas ng disiplina, at taglay ang mga kinakailangang kasanayan sa epektibong pagtupad sa kanilang tungkulin para sa kaligtasan at seguridad ng mamamayan alinsunod sa “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Panulat ni PCpl Doxie Charesse C Casasos
