Naaresto ng mga operatiba ng Philippine National Police (PNP) ang isang National Most Wanted Person na nahaharap sa kasong carnapping sa isinagawang intelligence-driven operation sa Purok 3, Barangay Sirang Lupa, Calamba City, Laguna, noong Agosto 14, 2026.
Ang 23-anyos na suspek, residente ng Guinobatan, Albay, ay naaresto ng pinagsanib na puwersa ng Regional Highway Patrol Unit 5, Regional Headquarters Intelligence, Philippine Highway Patrol Team Albay, at 1st Albay Provincial Mobile Force Company.
Ipinatupad sa suspek ang Warrant of Arrest na inilabas ng Regional Trial Court, Fifth Judicial Region, Branch 4, Legazpi City, para sa paglabag sa Section 3 ng Republic Act No. 10883 o New Anti-Carnapping Act of 2016, kung saan walang inirekomendang piyansa. Nanatili siya sa pansamantalang kustodiya ng pulisya para sa kaukulang disposisyon bago ibalik ang warrant sa issuing court.
Binigyang-diin ni PNP Chief PGen Jose Melencio C. Nartatez Jr. na ipinapakita ng naturang pag-aresto kung paano nagiging epektibo ang police intelligence at field operations sa pagtunton sa mga wanted person at paglalapit sa kanila sa proseso ng hustisya. Aniya, “Hindi nagtatapos sa isang operasyon ang ating tungkulin. Paiigtingin natin ang pagtugis sa mga sangkot sa carnapping at ang pagpapatupad ng mga hakbang upang maiwasan ang ganitong krimen.”
Bahagi ang operasyon ng PNP Focused Agenda — Enhanced Managing Police Operations, na naglalayong palakasin ang operational effectiveness at pagpapatupad ng mga legal na proseso. Sa ilalim ng pamumuno ni PGen Nartatez at alinsunod sa direktiba ni Pangulong Ferdinand R. Marcos Jr., patuloy na pinagtitibay ng PNP ang paghahanap sa mga wanted person at pagpapanatili ng rule of law, bilang katuparan ng “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PNP-PIO (https://www.facebook.com/share/p/1FXMpk11kn/?mibextid=wwXIfr)
