Nakiisa ang Lagawe Municipal Police Station (MPS), sa pangunguna ni PLt Federico B. Dulnuan, Deputy Chief of Police, sa community outreach and information drive na inilunsad ng Municipal Advisory Group for Police Transformation and Development (MAGPTD) sa Ayangan National Agricultural and Vocational High School sa Barangay Ponghal, Lagawe, Ifugao noong Hunyo 25, 2026.
Pinangunahan ni Hon. Marlon B. Bandao, MAGPTD Adviser, ang pamamahagi ng mga school supplies at financial assistance sa mga piling mag-aaral, na sinundan ng konsultasyon sa mga guro at kawani hinggil sa mga usapin ng kaligtasan at seguridad sa loob ng paaralan. Ipinakita ng naturang aktibidad ang matibay na ugnayan ng pulisya, pamahalaang lokal, at komunidad sa pagsusulong ng kapakanan ng mga mag-aaral.
Sa simple ngunit makabuluhang programa, binigyang-diin ni PLt Dulnuan ang kahalagahan ng pagtutulungan ng iba’t ibang sektor upang mapanatiling ligtas ang mga paaralan, habang hinikayat naman ni Hon. Bandao ang mga kabataan na pahalagahan ang edukasyon at aktibong makiisa sa mga programang pangkomunidad.
Tinalakay rin ni PCpl Jeraldine B. Delfin ang tungkol sa panganib ng ilegal na droga at anti-bullying awareness upang mahikayat ang mga mag-aaral na maging responsableng mamamayan at tagapagtaguyod ng isang ligtas at maayos na kapaligiran sa paaralan.
Dagdag pa rito, nagsagawa rin ang mga pulis at mga opisyal ng barangay ng libreng gupit sa ilalim ng programang “Pulis Ko, Barbero Ko,” na naghatid ng saya at kumpiyansa sa mga mag-aaral. Ipinamalas ng gawaing ito ang patuloy na dedikasyon ng Lagawe MPS at ng mga katuwang nitong organisasyon sa pagpapalakas ng ugnayan sa komunidad at pagbibigay ng makabuluhang serbisyo sa kabataan.
Patunay ang matagumpay na inisyatibang ito sa patuloy na pagsisikap ng Philippine National Police na isulong ang kapakanan ng mamamayan sa pamamagitan ng mga programang nakatuon sa edukasyon, kaligtasan, at pakikipagkapwa, alinsunod sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PNP Lagawe MPS
