Naaresto ng Philippine National Police – Maritime Group, sa pamamagitan ng Iloilo Maritime Police Station (MARPSTA), ang isang indibidwal na may kasong estafa, bilang bahagi ng patuloy na pagsisikap ng PNP na maghatid ng mabilis, tapat, at makataong serbisyo sa mamamayan.
Dakong 12:30 ng tanghali ng Pebrero 9, 2026, sa Iloilo Fishing Port Complex, Brgy. Tanza Baybay, Iloilo City, isinagawa ng mga operatiba ng Iloilo MARPSTA ang pag-aresto sa isang indibidwal na kinilala sa alyas na “Pam”, sa bisa ng Warrant of Arrest para sa kasong Estafa na may itinakdang piyansa na Php36,000.
Matapos ang pag-aresto, maayos na ipinaalam sa akusado ang kalikasan ng kanyang pagkakasala, ipinaunawa ang kanyang mga karapatang konstitusyonal, at ipinaalalahanan hinggil sa mga probisyon ng Anti-Torture Act sa wikang lubos niyang nauunawaan. Kasunod nito, siya ay dinala sa Iloilo MARPSTA para sa kaukulang dokumentasyon at para sa pagsagawa ng mga kinakailangang ligal na hakbang, alinsunod sa umiiral na mga batas, alituntunin, at itinakdang pamamaraan.
Ang operasyong ito ay sumasalamin sa nakatuong direksyon ng pamunuan ng PNP na palakasin ang tiwala ng publiko sa kapulisan sa pamamagitan ng propesyonal, makatao, at episyenteng pagpapatupad ng batas.
Patuloy na pinagtitibay ng PNP-Maritime Group ang paninindigan nito sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman,” kung saan ang bawat kilos ng kapulisan ay nakatuon sa kapakanan, karapatan, at seguridad ng sambayanang Pilipino.
