Nakumpiska ng Bulacan PNP ang malaking halaga ng ilegal na droga mula sa isang High Value Individual sa isinagawang buy-bust operation sa Barangay Catmon, Santa Maria, Bulacan nito lamang Martes, ika-23 ng Abril 2024.
Kinilala ni Police Colonel Relly B Arnedo, Provincial Director ng Bulacan Police Provincial Office, ang naarestong suspek na si alyas “Miyong”, 51 anyos, may asawa, walang trabaho at residente ng Kalye Onse, Barangay Catmon, Santa Maria, Bulacan.
Naging matagumpay ang operasyon sa pinagsanib na pwersa ng mga tauhan ng Station Drug Enforcement Unit ng Sta Maria Municipal Police Station, Bulacan Intelligence Unit at Philippine Drug Enforcement Agency – Bulacan.
Ayon sa ulat, naharang ng mga nasabing awtoridad ang suspek at nasabat ang malaking halaga ng shabu na kung saan kasalukuyan pang kinukumpirma ang kabuuang halaga nito.
Nahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002.
Ang Bulacan PNP ay walang tigil sa pagsasagawa at pagpapaigting ng kampanya laban sa mga gumagamit at nagbebenta ng ilegal na droga para masiguro ang kaayusan sa kanilang nasasakupan.
Panulat ni Pat Mildred A Tawagon
