Dalawang suspek arestado ng PRO13; Php260K halaga ng hinihinalang smuggled na sigarilyo, nakumpiska sa Tandag City

0
49

Arestado ng Police Regional Office 13 (PRO13) ang dalawang suspek at nasamsam ang 400 ream ng hinihinalang smuggled na sigarilyo na nagkakahalaga ng Php260,000 sa isinagawang anti-smuggling operation sa Tandag City, Surigao del Sur, noong Nobyembre 15, 2026.

Pinuri ni PBGen Rolindo M. Suguilon, Regional Director ng PRO13, ang mga tauhan ng Surigao del Sur Police Provincial Office–Provincial Intelligence Unit, katuwang ang Tandag City Police Station (CPS) at 2nd Surigao del Sur Provincial Mobile Force Company, sa matagumpay na operasyon laban sa pagbebenta at transportasyon ng mga pekeng, walang kaukulang dokumento at ipinuslit na sigarilyo.

Ayon sa ulat, pinara ng mga operatiba ang isang sasakyan sa kahabaan ng National Highway sa Brgy. Buenavista, Tandag City. Gayunman, hindi huminto ang driver at sa halip ay pinaharurot ang sasakyan, dahilan upang habulin ito ng mga pulis.

Pagdating sa Purok Papaya, Brgy. Salvacion, sa naturang lungsod, aksidenteng bumangga ang tumatakas na sasakyan sa isang Bao-Bao vehicle, dahilan upang magkalat sa lugar ang ilang ream ng hinihinalang ipinuslit na sigarilyo. Tinangka pang tumakas ang driver at pasahero, ngunit agad din silang naaresto ng mga humabol na pulis.

Kinilala ang mga naaresto bilang si alyas “Abdul,” 45-anyos, isang negosyante at residente ng Brgy. Villa Kananga, Butuan City, at isang 16-anyos na menor de edad.

Nasamsam sa operasyon ang 400 ream ng Casablanca cigarettes na nagkakahalaga ng tinatayang Php260,000, gayundin ang isang Mitsubishi Mirage na ginamit sa pagdadala ng mga hinihinalang ipinuslit na sigarilyo.

Kapwa nagtamo ng mga pinsala ang dalawang naaresto dahil sa aksidente at agad silang isinugod ng mga rumespondeng tauhan ng City Disaster Risk Reduction and Management Office (CDRRMO) sa Adella Serra Ty Memorial Hospital para sa kaukulang medikal na atensiyon.

Sa kasalukuyan, nasa kustodiya na ng Tandag CPS ang mga naarestong indibidwal at mga nakumpiskang ebidensiya para sa wastong dokumentasyon at kaukulang disposisyon.

Ayon kay PBGen Suguilon, nananatiling matatag ang PRO13 sa kampanya nito laban sa smuggling at paglaganap ng mga ilegal na produktong tabako sa rehiyon.

“Patuloy naming palalakasin ang mga operasyong nakabatay sa intelligence at makikipagtulungan sa aming mga katuwang na ahensiya upang matiyak na mananagot ang mga indibidwal na sangkot sa mga ilegal na aktibidad na ito,” pahayag ni PBGen Suguilon.

Mahaharap si alyas “Abdul” sa kaukulang kasong paglabag sa Republic Act No. 10643 o Graphic Health Warnings Law. Samantala, ang menor de edad ay nararapat na isailalim sa wastong proseso at i-turn over sa kinauukulang awtoridad.

Source: https://www.facebook.com/share/p/1DJnFpxLfx/?mibextid=wwXIfr

Leave a Reply