Cubao, Quezon City — Arestado ang Chairwoman ng United Muslim Lumad Inter Faith (UMLIF) na nambiktima umano ng mga kandidato sa manhunt operation ng Quezon City PNP nitong Biyernes, Mayo 6, 2022.
Kinilala ni Police Brigadier General Remus Medina, District Director ng QCPD ang suspek na si Aisha Noreen Estrada-Verano, 54, nakatira sa Brgy. San Martin De Porres, Cubao, Quezon City.
Ayon kay PBGen Medina, dakong ika-6:00 ng umaga naaresto si Verano sa kahabaan ng Gen. Roxas corner Times Square St., Brgy. Socorro, Cubao, Quezon City ng mga operatiba ng Cubao Police Station (PS 7).
Batay sa report, habang nasa Bauang, La Union sina Verano kasama ang dalawa pa niyang kasabwat na kinilalang sina Rocky Boadilla at Danny Martinez, sila ay nakahikayat ng 40 kandidato mula sa Norte at napaniwalang may koneksyon sila sa isa sa presidential aspirant na kung saan magbibigay umano ito ng election fund.
Kasabay sa panlilinlang at pagpapanggap ng mga suspek ay nagbigay ng Php2,000 ang bawat isa sa mga biktima bilang registration fee upang makuha ang pinangakong pondo.
Mahaharap ang suspek sa kasong paglabag sa Article 315 ng RPC, Swindling (Estafa).
Samantala, ikinasa naman ang isa pang manhunt operation kina Boadilla at Martinez.
“Pinupuri ko ang PS 7 para sa kanilang mabilisang pagtugon sa insidente na nagresulta sa pagkakahuli ng suspek. Maging babala po sana ito hindi lang sa mga kandidato, kundi pati na rin sa ating mga kababayan na mag-doble ingat sa ganitong modus. Huwag po basta magtiwala lalo na kung may perang involve. I also commend the presence of mind of the victims who reported the incident immediately and I would like to call on other victims of similar modus to come forward and press additional charges against the suspects,” ani PBGen Medina.
Source: QCPD PIO
###
Panulat ni PSSg Remelin Gargantos
