Pinalakas ng Bulacan Police Provincial Office (BPPO) ang pakikipag-ugnayan nito sa mga paaralan sa buong lalawigan sa pamamagitan ng pagsasagawa ng mga dayalogo at coordination meetings na pinangunahan ni PCol Jay B. Baybayan, Acting Provincial Director. Layunin ng inisyatibong ito na higit pang mapatatag ang seguridad at kapakanan ng mga mag-aaral kasunod ng mga insidenteng may kinalaman sa karahasan na kinasasangkutan ng kabataan sa iba’t ibang bahagi ng bansa.
Sa mga isinagawang pagpupulong, tinalakay ng mga kinatawan ng kapulisan, mga guro, at school administrators ang mga usaping may kaugnayan sa school safety, crime prevention, anti-bullying measures, at iba pang programang naglalayong mapanatili ang isang ligtas, maayos, at kaaya-ayang kapaligiran sa pag-aaral. Binigyang-diin din ang kahalagahan ng maagap na pag-uulat, bukas na komunikasyon, at epektibong koordinasyon sa pagitan ng mga paaralan at mga awtoridad upang maiwasan ang mga insidenteng maaaring magdulot ng panganib sa mga mag-aaral.
Ayon sa BPPO, mahalaga ang malapit na pagtutulungan ng kapulisan, sektor ng edukasyon, mga magulang, at lokal na pamahalaan upang mapalakas ang kamalayan ng kabataan hinggil sa kanilang kaligtasan at kapakanan. Kasama rin sa programa ang pagpapaigting ng information-sharing at mga preventive measures upang maprotektahan ang mga mag-aaral laban sa iba’t ibang banta sa loob at labas ng paaralan.
Ipinakikita ng inisyatibong ito ang patuloy na pagsisikap ng Philippine National Police na mapanatili ang kapayapaan at kaayusan sa mga komunidad, kaakibat ang pagsusulong ng adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman” na nakatuon sa paglikha ng isang ligtas at mapayapang kapaligiran para sa bawat mag-aaral.
Source: Bulacan PPO
