Matagumpay na naaresto ng Northern Police District (NPD) ang apat na wanted persons sa loob lamang ng 24 oras sa isinagawang “Warrant Day” operation, noong Abril 25 hanggang kinaumagahan ng Abril 26, 2026, ng iba’t ibang yunit at himpilan ng pulisya sa ilalim ng pamumuno ni PBGen Christopher R. Dela Cruz.
Kabilang sa mga nadakip ang dalawang Top Most Wanted Persons, isang Most Wanted Person, at isang Other Wanted Person, na pawang nahaharap sa iba’t ibang kasong kriminal tulad ng acts of lasciviousness, illegal possession of bladed weapon, at paglabag sa Comprehensive Dangerous Drugs Act of 2002.
Isa sa mga naaresto ay isang 50-anyos na lalaki na nakatala bilang Top 7 Most Wanted Person sa district level. Nahuli siya sa isang barangay sa Manaoag, Pangasinan sa bisa ng warrant of arrest para sa acts of lasciviousness at illegal possession of a bladed weapon, habang maingat na naitala ang operasyon gamit ang body-worn camera para sa mas malinaw na dokumentasyon.
Naaresto rin ng District Special Operations Unit ang isang 34-anyos na lalaking Top 9 Most Wanted Person sa station level dahil sa paglabag sa Section 11 ng RA 9165. Dinakip siya sa Malabon City sa bisa ng warrant of arrest na may inirekomendang piyansang Php200,000, at sumailalim sa medikal na pagsusuri bago dinala sa kustodiya ng pulisya.
Samantala, isa pang 33-anyos na Most Wanted Person ang nadakip ng mga tauhan ng Caloocan City Police Station. Sa operasyon, nakumpiska mula sa kanya ang tinatayang 5.40 gramo ng hinihinalang shabu na nagkakahalaga ng Php36,720, na maayos na naimbentaryo sa presensya ng mga kinakailangang saksi alinsunod sa umiiral na mga patakaran.
Pinuri ni PBGen Dela Cruz ang mga operatiba dahil sa kanilang disiplina at propesyonalismo sa matagumpay na pagpapatupad ng batas. Aniya, ang naturang operasyon ay patunay ng mahigpit na pagpapatupad ng F.I.G.H.T. C.R.I.M.E.S. framework ng PNP upang mapanatili ang seguridad ng komunidad.
Muling ipinakita ng Northern Police District ang kanilang matatag na paninindigan sa pagpapanatili ng kaayusan at pagsugpo sa kriminalidad sa pamamagitan ng “Serbisyong Mabilis, Tapat, at Nararamdaman,” na layong maghatid ng ligtas at mapayapang pamayanan para sa bawat mamamayan.
Source: NPD-PIO
