Personal na dumalo si Police Lieutenant General Jose Melencio C. Nartatez Jr., Acting Chief ng Philippine National Police, sa ika-34 anibersaryo ng Aviation Security Group (AVSEGROUP), na may temang “Naglilingkod ng Tapat tungo sa Paliparang Payapa at Ligtas para sa Bagong Pilipinas,” noong Agosto 28, 2025 sa Headquarters, NAIA Complex, Pasay City.
Bilang kinatawan ng buong pwersa ng kapulisan, dala ni PLtGen Nartatez sa kanyang pagdalo ang taos-pusong pagbati sa AVSEGROUP at mas pinalakas na pagtutulungan sa mga partner stakeholders at mga organisasyon para panatilihin ang kapayapaan at seguridad sa mga paliparan.
Kasama sa mga dumalo ay ang panauhing pandangal at tagapagsalita na si Secretary Vivencio B. Dizon ng Department of Transportation, na nirepresenta ni ASEC Jose A. Briones, Jr., Deputy Administrator ng Office for Transportation Security.
Sa mensahe ni Sec. Dizon na ibinahagi ni ASEC Briones, binigyang-diin niya ang mas pinalakas na pagtutulungan at kooperasyon ng mga ahensya, mas pinahusay na cyber protection sa mga paliparan, mas mahigpit na pagpapatupad ng mga regulasyon para sa seguridad, at ang patuloy na pagpapaigting sa mga hakbang laban sa mga ilegal na operasyon sa NAIA.
Pinakatampok din sa selebrasyon ang pagtatanghal ng mga parangal sa mga natatanging yunit, tauhan, at stakeholders na malaki ang naging bahagi sa pagsusulong ng seguridad sa aviation at kanilang mga mithiin.
Ang kaganapan ay muling pinagtibay ang hindi natitinag na pangako ng PNP sa pagtiyak ng isang ligtas at mapayapang paliparan para sa isang Bagong Pilipinas.
