Naharang ng Police Regional Office 6 (PRO6) ang humigit-kumulang 70 gramo ng hinihinalang shabu na may Standard Drug Price (SDP) na Php476,000, kasunod ng pagkakaaresto sa isang drug personality sa isinagawang buy-bust operation sa Purok 7, Brgy. Funda-Dalipe, San Jose, Antique, dakong alas 2:19 ng madaling-araw, noong Setyembre 18, 2026.
Naaresto sa operasyon si alyas “Koy-koy,” 31 anyos, binata, auto mechanic, at residente ng San Jose, Antique.
Isinagawa ang operasyon matapos ang serye ng intelligence validation, surveillance, at target profiling ng San Jose Municipal Police Station–Station Drug Enforcement Team, katuwang ang mga operatiba ng Antique Provincial Drug Enforcement Unit (PDEU) at PDEA Antique Provincial Office.
Nasamsam sa operasyon ang isang sachet ng hinihinalang shabu na ginamit bilang buy-bust item, apat na karagdagang sachet na naglalaman din ng hinihinalang shabu, at buy-bust money.
Ang suspek ay kasalukuyang nasa kustodiya ng San Jose MPS para sa kaukulang dokumentasyon at disposisyon habang inihahanda ang kasong paglabag sa Republic Act No. 9165, o Comprehensive Dangerous Drugs Act of 2002.
Ayon kay PBGen Randulf T Tuaño, Regional Director ng PRO6, ang matagumpay na operasyon ay patunay sa halaga ng maayos na intelligence work at koordinasyon sa pagpapatupad ng batas.
“Ang tagumpay na ito ay bunga ng tamang impormasyon, masusing validation, at pagkakaisa ng ating mga katuwang sa law enforcement. Ipinapakita nito na kapag nagtutulungan ang kapulisan, mga ahensya ng pamahalaan, at komunidad, mas mabilis nating natutugunan ang mga banta ng ilegal na droga. Patuloy nating paiigtingin ang ating intelligence-driven at community-centered approach upang hindi lamang makahuli, kundi higit sa lahat, maprotektahan ang ating mga mamamayan at mapanatili ang kapayapaan sa Western Visayas,” pahayag ni PBGen Tuaño.
Hinihikayat din ng PRO6 ang publiko na patuloy na makipagtulungan sa kapulisan sa pamamagitan ng pagbabahagi ng impormasyon hinggil sa mga ilegal na aktibidad sa kanilang mga komunidad. Ang aktibong pakikipagtulungan ng mamamayan ay mahalagang katuwang sa pagpapanatili ng ligtas at mapayapang Western Visayas, alinsunod sa adbokasiya ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
